Yeni nəticələr əlavə olunub (ilk xəbər saat 20:51-də yayılıb)
Azərbaycan, Bakı, 21 iyun /Trend, müxbir İlkin İzzət/
Bu gün Avropa Oyunlarında daha bir boksçumuz rinqə çıxıb.
Trend-in məlumatına görə, Azərbaycanı kişilər arasında birinci yarım-orta çəki (64 kq) dərəcəsində təmsil edən Kollazo Sotomayor 1/8 finalda Dmitri Qalaqot ilə qarşılaşıb.
Rinqdə daha baxımlı döyüş nümayiş etdirən təmsilçimiz bütün raundlarda rəqibindən üstün olub - 3:0.
Onun 1/4 finaldakı rəqibi rumıniyalı Daniel Nikulesku olacaq. Döyüş iyunun 23-də saat 20:15-də keçiriləcək.
X X X
Bu gün təmsilçilərimizdən rinqə son olaraq Azərbaycanı orta çəkidə (75 kq) təmsil edən Xaybula Musalov çıxıb.
O, 1/8 final mərhələsindəki döyüşdə Fransadan olan boskçu Kristian Mbilli Assomo-Hallier ilə qarşılaşıb.
Gərgin keçən döyüş boksçumuzun xeyrinə başa çatıb - 3:0.
X.Musalov 1/4 finalda belaruslu Vitali Bandarenka ilə qarşılaşacaq. Döyüş iyunun 24-də saat 13:30-da baş tutacaq.
Xatırladaq ki, bu gün bundan əvvəl rinqə 3 boksçumuz çıxıb. Azərbaycanı qadın boksçuların yarışında yüngül çəkidə (57-60 kq) təmsil edən Yana Alekseyeva 1/8 finalda Finlandiya idmançısına, kişi boksçularımızdan yarım-orta çəkidə (69 kq) çıxış edən Pərviz Bağırov 1/8 finalda Moldova boksçusuna, ağır çəkidə (91 kq) yarışan boksçumuz Aldulkadir Abdullayev isə Macarıstan idmançısına qalib gələrək 1/4 finala yüksəlib.