Azərbaycan, Bakı, 2 oktyabr /Trend, müxbir C.Babayeva /
Dünya şöhrətli kolumbiyalı müğənni Şakira bakılı pərəstişkarlarına müraciət edib.
Trend-in məlumatına görə, konsertin təşkilatçısı "Omnikomo Music Group" şirkətinin Facebook-dakı rəsmi səhifəsində müğənninin videomüraciəti təqdim olunub.
"Şakira bu il yalnız Bakıda - oktyabrın 14-də konsertlə çıxış edəcək!", - "Omnikomo Music Group" şirkətinin Facebook-dakı səhifəsində bildirilir.
Şakira qadınlar arasında futbol üzrə dünya çempionatının bağlanışında və "Bakı Kristal Zal"ındakı konserti zamanı möhtəşəm şou nümayiş etdirəcəyini vəd edir.
Xatırladaq ki, bir neçə gün əvvəl müğənni özünün Twitter sosial şəbəkəsindəki rəsmi səhifəsində bildirib ki, oktyabrın 13-14-də Bakıdakı çıxışını səbirsizliklə gözləyir.
Bir qədər əvvəl dünya şöhrətli müğənni Şakira hamilə olması ilə əlaqədar bir neçə tədbiri təxirə salıb, lakin Bakıya dəvətdən imtina edə bilməyib.
Müğənninin sözlərinə görə, o və sevgilisi - "Barselona"nın oyunçusu Herard Pike ilk övladlarının dünyaya gəlişi ərəfəsində bütün reklam tədbirlərindən imtina etməyi qərara alıblar.
"Katalonların gəlini" hamiləliyinin hansı ayında olduğunu dəqiqləşdirməyib. Şakira hamilə olması səbəbindən sentyabrın 21-22-də Las-Veqasda keçirilən "iHeartRadio" musiqi festivalında iştirak etməyib.