Bakı. Trend:
Avropa Komissiyası humanitar vəziyyətin pisləşməsi ilə əlaqədar 2024-cü ildə Fələstin əhalisi üçün 125 milyon avro məbləğində ilkin humanitar yardım elan edib.
Trend-in məlumatına görə, bu barədə Avropa Komissiyasının kommünikesində deyilib.
Qeyd olunub ki, bu vəsait Qəzza zolağı və İordan çayının qərb sahilindəki humanitar təşkilatlara dəstək üçün istifadə olunacaq.
Sənəddə qeyd edilib ki, humanitar ehtiyacların rekord həddə çatdığı Qəzza zolağında əsas diqqət insanların həyatını xilas etmək və su, qida, səhiyyə, sığınacaq və kanalizasiya kimi əsas ehtiyaclara çıxışı bərpa etmək üçün fövqəladə hallara cavab veriləcək. Eyni zamanda, prioritet dəstək ən həssas qrupların müdafiəsinə yönəldiləcək.
Bir çox Fələstin icmasının təhdidlərlə üzləşdiyi və ya artıq məcburi köçkün edildiyi İordan çayının qərb sahilində Aİ tərəfindən maliyyələşdirilən humanitar yardım layihələri məskunlaşanların zorakılığından, əmlakın müsadirə edilməsindən və ya dolanışıq vasitələrinin itirilməsindən təsirlənənlərə hüquqi yardım və ya maddi dəstək kimi müdafiə xidmətləri göstərəcək.