Azərbaycan, Bakı, 29 iyul /Trend, müxbir K.Zərbalıyeva/
Dənizdə batmaq təhlükəsi ilə üzləşən 8 nəfər xilas olunub.
Trend-in Fövqəladə Hallar Nazirliyinin internet saytına istinadən verdiyi məlumata görə, dünən günün müxtəlif saatlarında Xəzər dənizinin nəzarət olunan hissəsində 8 nəfər çimərkən suda batma təhlükəsi ilə üzləşib.
Həmin şəxslər Fövqəladə Hallar Nazirliyinin dalğıc-xilasediciləri tərəfindən xilas edilib.
Xilasedicilər dünən suda batmış iki nəfərin meyitini sudan çıxarıblar.
Xan Qızı kanalının Beyləqan rayonu, Əmirzeyidli kəndi ərazisindən keçən hissəsində batmış 1992-cü il təvəllüdlü Bayramov Rabil Qabil oğlunun və Xəzər dənizinin Sumqayıt şəhəri sahillərində, nəzarət olunmayan ərazidə batmış Fərid Məmmədovun cəsədləri Fövqəladə Hallar Nazirliyinin dalğıc-xilasediciləri tərəfindən tapılaraq sudan çıxarılıb.
Xilasedicilər Yuxarı Qarabağ kanalının Ağcabədi rayonu, Xocavənd kəndi ərazisindən keçən hissəsində batdığı ehtimal edilən şəxsin axtarışlarına başlayıblar.