Azərbaycan, Bakı, 7 noyabr /Trend/
Qurban bayramından sonrakı ilk günlərdə Suriyanın müxtəlif şəhərlərində toqquşmalarda 22 nəfər həlak olub. Trend-in məlumatına görə, bu barədə bazar ertəsi Qətərin "Əl-Cəzirə" telekanalı xəbər yayıb.
Suriyada hökumət əleyhinə etiraz aksiyaları təqribən səkkiz aydır davam edir. Birləşmiş Millətlər Təşkilatının (BMT) məlumatına görə, indiyə qədər toqquşmalar nəticəsində ölənlərin sayı 3 min nəfəri keçib. Suriya hökuməti isə hər iki tərəfdən 1,5 min nəfərdən çox insanın, o cümlədən 1,1 min nəfərdən çox təhlükəsizlik orqanları əməkdaşının öldüyünü bildirir.
Ölkə müxalifəti Prezident Bəşşar əl-Əsədin istefasını və siyasi islahatların keçirilməsini tələb edir. ABŞ və Avropa İttifaqı əl-Əsədi istefaya getməyə çağırıb və Suriyaya qarşı sanksiyaların tətbiq edilməsində təkid edirlər.
Suriyanın hüquq-mühafizə qüvvələri artıq beş gündür ki, Xüms şəhərinin mühasirəsini davam etdirirlər.
"Xümsün mühasirəsi sakinlərin iradəsini qırmaq məqsədi daşıyır", - Suriya Milli Şurasının bəyanatında deyilir.
Müxalifət Şurasının üzvləri birgə bəyanatda ölkənin təhlükəsizlik orqanlarını pisləyirlər. Bəyanatda qeyd olunur ki, Xüms sakinlərinin şəhəri tərk etmək, daha təhlükəsiz yer tapmaq imkanları yoxdur.