Bakı. Trend:
Qaradağ rayonunda qadını evi ilə birlikdə yandırıb öldürən şəxs saxlanılıb.
Baş Prokurorluq və Daxili İşlər Nazirliyindən Trend-ə verilən
məlumata görə,
prokurorluq və polis əməkdaşları tərəfindən peşəkarlıqla həyata
keçirilmiş istintaq-əməliyyat tədbirləri nəticəsində paytaxtın
Qaradağ rayonu, Lökbatan qəsəbəsi ərazisində qeyri-aşkar şəraitdə
törədilmiş ağır cinayətin “isti izlərlə” açılması təmin edilib.
Belə ki, mayın 27-i saat 07 radələrində Qaradağ rayonu, Lökbatan qəsəbəsi ərazisində yerləşən fərdi yaşayış evində yanğın baş verməsi və orada yaşayan 1961-ci il təvəllüdlü Xuraman Həsənovanın üzərində xəsarət izləri olan meyitinin aşkar edilməsi barədə rayon prokurorluğuna məlumat daxil olub.
Cinayət işi üzrə həyata keçirilmiş intensiv istintaq və əməliyyat tədbirləri ilə qeyd edilən cinayət əməlinin 1985-ci il təvəllüdlü Orxan Novruzov tərəfindən şəxsi münasibətlər zəminində törədilməsinə əsaslı şübhələr müəyyən edilib.
Faktla bağlı Qaradağ rayon prokurorluğunda Cinayət Məcəlləsinin 120.1-ci (qəsdən adam öldürmə) maddəsi ilə cinayət işi başlanıb
Orxan Novruzov şübhəli şəxs qismində tutularaq istintaqa cəlb
edilmişdir.
Hazırda cinayət işi üzrə istintaq davam edir.
