Oktyabrın 25-də Göyçay rayon məhkəmə-tibb ekspertiza şöbəsində saxlanılan cəsədlərə Krasnodardan gəlmiş ekspertlər tərəfindən baxış keçirilib. Bu barədə Trend ə Göyçay rayon prookurorunun böyük köməkçisi Əhliman Bağırov məlumat verib.
Ə.Bağırov: "Rusiya Federasiyasının (RF) Krasnodar şəhərindən gəlmiş ekspertlərə baş vermiş hadisə ilə bağlı ətraflı məlumat verilib. Rusiyalı ekspertlərlə bizim istintaq qrupu hadisə yerinə birgə baxış keçiriblər və bununla bağlı müvafiq sənədlər tərtib edilib. Oktyabrın 26-da isə mərhumların cənazələri Gəncə şəhərindən təyyarə ilə Krasnodara yola salınacaq".
Prokurorun böyük köməkçisi onu da bildirib ki, mərhumların üzərindəki xəsarətlərin baş vermiş hadisə nəticəsində yaranması artıq rusiyalı ekspertlər tərəfindən də təsdiqlənib. "Ekspertlər sabah öz ölkələrinə qayıdacaqlar" - deyə Ə.Bağırov söyləyib.
Qeyd edək ki, RF-yə məxsus vertolyot oktyabrın 22-də Göyçay rayonu ərazisində qəzaya uğrayıb və nəticədə 5 nəfər RF vətəndaşı hadisə yerindəcə həlak olub.