Azərbaycan, Şəki / Trend müxbir E.Quliyev/ Azərbaycanın şimal-qərb bölgəsində dünəndən başlayan aramsız yağışlar bölgə ərazisindən keçən çaylarda daşqınlara səbəb olub. Ekologiya və Təbii Sərvətlər Nazirliyinin (ETSN) Milli Hidrometeorologiya Departamentinin ərazi hidrometeorologiya idarəsinin rəisi Akif Əhmədov çərşənbə günü bildirib ki, yağıntı ən çox Balakən rayonuna düşdüyündən həmin rayonun ərazisindən keçən Katex, Tala, Mazin və Gumruk caylarında daşqın baş verib.
Daşqınlar çay yaxınlığındakı əkin və taxıl sahələrinə ziyan vurub. Rayon İcra Hakimiyyətindən verilən məlumata görə, dəyən ziyanın aradan qaldırılması və hesablanması istiqamətində müvafiq tədbirlər görülür.
Eyni zamanda güclü yağışlar nəticəsində Şəkidən keçən Kiş çayı məcrasından çıxıb. Bu da şəhərin içməli su təchizatında problemlərin yaranmasına səbəb olub. Şəki Su və Kanalizasiya İdarəsinin rəisi Bayram Məmmədovun sözlərinə görə, dünən səhərdən şəhərə içməli suyun verilməsi dayandırılıb. İçməli suyun bu gün verilməsi nəzərdə tutulub.
Balakən paytaxt Bakıdan 490, Şəki 420 kilometr şimal-qərbdə yerləşir.
