Azərbaycan, Bakı, 8 oktyabr /Trend/
Amerikanın Detroyt şəhərində daşınmaz əmlak agentliyinin saytında qeyri-adi təklif verilib: bir kişi ikimərtəbəli evini satır və ya onu "iPhone 6" ilə dəyişməyi təklif edir. Trend xəbər verir ki, bu barədə "Fox 2" telekanalı məlumat yayıb.
Üç yataq otağı olan kərpic ev hələ bir neçə ay bundan əvvəl beş min dollara satışa çıxarılmışdı. Avqustda onun qiyməti 3 min dollaradək aşağı düşüb. Ancaq özünü müflis elan edib şəhərdə mülk almağı arzu edən tapılmadığından evin sahibi onu yeni smartfona dəyişməyə qərar verib.
Rielitor bildirib: "Bu elan həqiqidir. Mənim müştərim xaricdə yaşayır və o, mənə bu sövdələşməni tapşırıb. Evin əvəzinə o, "iPhone 6 Plus" və ya yaddaşının həcmi 32 qiqabayt olan "iPad" istəyir".
ABC News-un məlumatına görə, mülkün sahibi Avstriyada yaşayır, o, heç vaxt Detroytda yaşamayıb.
Adı açıqlanmayan bu şəxs 2010-cu ildə bu evi icarəyə vermək üçün 41 min dollara alıb. Lakin o, satıcının həmin evi 2 həftə əvvəl cəmi 10,5 min dollara aldığını bilməyib. Şəhər tənəzzülə uğrayanda evi kirayələmək istəyən olmayıb.
Bu arada, daşınmaz əmlak agentliyinə artıq bu təkliflə maraqlananlar müraciət edib. Onlardan biri evi "iPhone 5"-lə dəyişdirməyi, ikisi isə ev üçün müvafiq olaraq 850 və 700 dollar təklif edirlər.
Qeyd edək ki, Detroyt şəhəri 2013-cü il dekabrın 3-də müflis elan edilib. Həmin vaxt şəhərin borcu 18,5 milyard dolları ötüb, büdcə kəsiri isə 280 milyon dollar təşkil edib.