Azərbaycan, Qazax, 13 mart / Trend , müxbir N.Fəttulayeva/ Norveçin Azərbaycandakı fövqəladə və səlahiyyətli səfiri Jon Ramberq Tovuz rayonunun ermənilərlə sərhəd kəndində olub. Trend -un bölgə müxbirinin məlumatına görə, Ramberq Tovuzun Ermənistanla sərhəd olan Əlibəyli kəndində yaranmış vəziyyətlə tanış olmaq üçün həmin ərazidə olub.
Əlibəyli kəndi ermənilərlə 17 kilometrlik sərhəddə yerləşir.
Ötən həftədən Tovuzun sərhəd kəndlərində ermənilər tərəfindən törədilən yanğın nəticəsində, neytral ərazilərdə 100, kəndə məxsus torpaqlardan 30 hektar ərazinin yandığı müəyyən edilib.
Bu barədə rayonun Əlibəyli və Hacallı kənd icra nümayəndəsi Məhərrəm Qasımov məlumat verib. O, bildirib ki, yanğın nəticəsində sakinlər ərazidə 10-a yaxın minanın partlamasının şahidi olublar.
Ermənilər ötən il də Tovuzun sərhəd kəndlərində yanğınlar törədiblər. Tovuzun bir neçə sərhəd kəndində ümumilikdə 50 hektardan çox torpağa od vurulub.
Yandırılan əraziləri müşahidə edən səfir jurnalistlərə bildirib ki, baş verən faktla bağlı araşdırma aparacaqlar.
