Azərbaycan, Bərdə, 07 may / Trend , müxbir Ş.Cəliloğlu/ ATƏT-in fəaliyyətdə olan sədrinin şəxsi nümayəndəsinin mandatına uyğun olaraq, bu gün Azərbaycanın Ağdam rayonunun Əfətli kəndi yaxınlığında, qoşunların təmas xəttində keçirilən monitorinq insidentsiz ötüşüb.
Ermənistan Azərbaycan ərazisinin 20 faizini - Dağlıq Qarabağı və ətrafındakı yeddi rayonu işğal edib. İşğal 1988-ci ildən başlayıb, 1991-ci ilin dekabrınadək Şuşa və Xocalı istisna olmaqla Dağlıq Qarabağ Azərbaycanın nəzarətindən çıxıb. 1992-93-cü illərdə isə Şuşa, Xocalı və Dağlıq Qarabağın ətrafındakı daha yeddi rayon işğal edilib. 1994-cü ildə Ermənistanla Azərbaycan arasında atəşkəs haqqında razılıq əldə olunub və indiyədək də tərəflər arasında sülh danışıqları davam etdirilir.
Monitorinqdən öncə ATƏT-in nümayəndələri Ağdam rayonunun icra başçısı Həsən Sarıyevlə görüşüblər. Sarıyev deyib ki, ermənilərin atəşkəsi intensiv pozması nəticəsində bu ilin 4 ayı ərzində Azərbaycanın 3 mülki vətəndaşı həlak olub, bir nəfər yaralanıb.
Dağlıq Qarabağ münaqişəsinin sülh yolu ilə tənzimlənməsi üçün üç ölkə - ABŞ, Rusiya və Fransa təmsilçilərinin həmsədrliyi ilə ATƏT-in Minsk Qrupu vasitəçilik edir.
İki ölkə arasında atəşkəs əldə olunduqdan sonra ATƏT qoşunların təmas xəttində intensiv monitorinqlər aparır.
Məqalə müəllifi ilə əlaqə ünvanı: [email protected]