Azərbaycan, Bakı, 16 dekabr/ Trend , müxbir A.Hüseynbala/ Azərbaycan parlamentinin birinci vitse-spikeri hesab edir ki, Azərbaycanın oz hərbi büdcəsini artırmasından Ermənistanın narahat olması çox yaxşı faktdır.
"Burada qeyri-adi hec n? yoxdur və düşmən tərəf Azərbaycanın gücləndiyini etiraf edir" - çərşənbə axşamı Trend -a Milli Məclis sədrinin birinci vitse-spikeri, təhlükəsizlik və müdafiə məsələləri daimi komissiyasının sədri Ziyafət Əsgərov bildirib.
Trend -ın arayışı: Ermənistanın xarici işlər naziri Edvard Nalbandyan bu günlərdə Azərbaycanın hərbi büdcənin artırılması üzrə apardığı siyasətin gözlənilməz nəticələrə gətirə biləcəyini deyib. Onun sözlərinə görə, Ermənistan dəfələrlə dünya ictimaiyyətinin diqqətini Azərbaycanın hərbi büdcəsini artırmasına və bu istiqamətdə fəaliyyətini davam etdirməsinə yönəltsə də, təəssüf ki, əksər ölkələr, o cümlədən də ATƏT belə rəftara və siyasətə, Azərbaycanın yol verdiyi beynəlxalq müqavilə pozuntularına heç bir qiymət vermir.
Parlamentin noyabrın ortalarında keçirilən iclasında 2009-cu ildə müdafiə və təhlükəsizlik sahəsinə iki milyard manatdan artıq (2,2 milyard dollara yaxın) maliyyə vəsaitinin ayrılmasını nəzərdə tutan qanun layihəsi təsdiqlənib.
2008-ci ildə Azərbaycanın müdafiə və təhlükəsizlik xərcləri 1,5 milyard manat (1,850 milyard dollar) olub.
2003-2008-ci illərdə müdafiə və təhlükəsizlik xərcləri 4,5 milyard dollar olub. 2003-2009-cu illərdə isə bu xərclər 7 milyard dollar təşkil edəcək.
Müdafiə və təhlükəsizlik sahəsinə ayrılan maliyyə vəsaitinin investisiya hissəsində yeni hərbi-texniki avadanlıqların alınması nəzərdə tutulub.
Əsgərovun sözlərinə görə, Azərbaycanın hərbi büdcəsini ildən-ilə artırması Dağlıq Qarabağ münaqişəsinin sülh yolu ilə nizamlanması prosesinə heç cür mane ola bilməz.
"Biz hərbi sahənin inkişafı üçün büdcədə nəzərdə tutulan qədər vəsait ay?rırıq" - birinci vitse-spiker əlavə edib.
Qarabağ probleminin həlli yolunda davam etdirilən sülh danışıqlarına gəldikdə, parlament sədrinin birinci müavini deyib ki, Azərbaycanın mövqeyi beynəlxalq hüquq və prinsiplərə uyğun olaraq getdikcə güclənir.
"Dünya ictimaiyyəti Azərbaycanın haqlı olduğunu daha yaxından duymağa başlayır. Ona görə d? erməni tərəfinin narahatlığı müəyyən dərəcədə başadüşüləndir. Çünki onlar bilirlər ki, həm beynəlxalq hüquq, həm də haqq-ədalət Azərbaycanın tərəfindədir", - Əsgərov vurğulayıb.
Ermənistan Azərbaycan ərazisinin 20 faizini - Dağlıq Qarabağı və ətrafındakı yeddi rayonu işğal edib. İşğal 1988-ci ildən başlayıb, 1991-ci ilin dekabrınadək Şuşa və Xocalı istisna olmaqla Dağlıq Qarabağ Azərbaycanın nəzarətindən çıxıb. 1992-93-cü illərdə isə Şuşa, Xocalı və Dağlıq Qarabağın ətrafındakı daha yeddi rayon işğal edilib. 1994-cü ildə Ermənistanla Azərbaycan arasında atəşkəs haqqında razılıq əldə olunub və indiyədək də tərəflər arasında sülh danışıqları davam etdirilir.
Dağlıq Qarabağ münaqişəsinin sülh yolu ilə tənzimlənməsi üçün üç ölkə - ABŞ, Rusiya və Fransa təmsilçilərinin həmsədrliyi ilə ATƏT-in Minsk qrupu vasitəçilik edir.
Məqalə müəllifi ilə əlaqə ünvanı: [email protected]
