Azərbaycan, Bakı, 18 iyun / Trend , müxbir C.Babayeva /
Azərbaycan Ziyalıları Birliyi Dağlıq Qarabağ münaqişəsinin həlli istiqamətində xalq diplomatiyasını həyata keçirmək üçün azərbaycanlı və erməni ziyalılarından ibarət birgə komissiya və ya ağsaqqallar birliyi yaradılmasını mümkün sayır.
"Əsas şərt hər iki tərəfdən həqiqətən də bu problemin həllinə yönələn səylərin olmasıdır. Münaqişənin ədalətli həllinə yalnız ziyalılar deyil, səmimi və xalqın mənafeyini güdən insanlar da töhfə verə bilərlər. Çünki həmin insanlar milliyyətindən asılı olmayaraq haqq-ədaləti tapdalamır", - cümə axşamı Trend -a birliyin sədri Eldəniz Quliyev bildirib.
Trend -un arayışı: 2007-ci il iyunun 28-də Azərbaycan və Ermənistanın Rusiyadakı səfirləri Polad Bülbüloğlu və Armen Smbatyanın təşəbbüsü ilə iki ölkə ziyalıları Xankəndi, İrəvan və Bakıya səfər ediblər. Azərbaycan nümayəndə heyətinin tərkibində Polad Bülbüloğlu, Fərhad Bədəlbəyli, Kamal Abdulla Azərpaşa Nemətov və İlhami Fətəliyev münaqişə zonasına və Ermənistana səfərdə iştirak edib. Növbəti səfərin bu ilin iyulunda reallaşdırılması planlaşdırılır.
Onun sözlərinə görə, Ermənistanın beynəlxalq hüquq normalarına əməl etməməsi, kompromisə getməməsi, sağlam məntiqə uyğun olan addımlar atmaması aydındır. Amma digər tərəfdən, münaqişə sonsuz olaraq davam edə bilməz, münaqişədən əzab çəkən qaçqın və məcburi köçkünlər var.
"İki dövlət arasında münaqişə həll edilə bilinmirsə, o zaman ziyalılar və cəmiyyətin digər fəal üzvləri münaqişənin həlli istiqamətində səylərini artırmalıdır. O zaman irəliləyişə nail olmaq olar", - Quliyev əlavə edib.
Trend - un arayışı: Azərbaycan Ziyalıları Hərəkatı 2003- cü ildə yaradılıb və 2007- ci ildə Ədliyyə Nazirliyində Azərbaycan Ziyalıları Birliyi kimi rəsmi qeydiyyatdan keçib. Təşkilatın məqsədi Azərbaycan ziyalılarının hüquqlarının müdafiəsi və müxalifətlə iqtidar arasında barışığa nail olmaqdır.
Məqalə müəllifi ilə əlaqə ünvanı: [email protected]