Azərbaycan, Bakı, 30 sentyabr /Trend, müxbir K.Zərbalıyeva/
Azərbaycan hökuməti Biləsuvar şəhərindəki lisey-məktəb kompleksinə Azərbaycanın MilliQəhrəmanı Mübariz İbrahimovun adının verilməsi haqqında qərar verib.
Nazirlər Kabinetindən cümə axşamı Trend-ə verilən məlumata görə, qərar "Milli Qəhrəman Mübariz İbrahimovun xatirəsinin əbədiləşdirilməsi haqqında" Azərbaycan Prezidentinin 22 iyul 2010-cu il tarixli sərəncamının 1-ci bəndinin icrasını təmin etmək məqsədi ilə qəbul edilib.
Qərar Biləsuvar rayon İcra Hakimiyyətinin Təhsil Nazirliyi ilə razılaşdırılmış təklifini nəzərə alaraq verilib.
İbrahimov iyunun 19-da Ermənistan Silahlı Qüvvələrinin hücumlarının qarşısını alaraq, qəhrəmanlıq göstərib. Nəticədə, 5 erməni hərbçisini öldürüb, 3-nü yaralayıb.
İyulun 22-də Azərbaycan Prezidenti İlham Əliyevin sərəncamı ilə İbrahimova "Milli Qəhrəman" adı verilib.
İki Cənubi Qafqaz ölkəsi arasında münaqişə 1988-ci ildə Ermənistanın Azərbaycana qarşı ərazi iddiası irəli sürməsi zəminində yaranıb. Azərbaycan torpaqlarının iyirmi faizi, yəni Dağlıq Qarabağ ərazisi və bu əraziyə bitişik yeddi rayon Ermənistan Silahlı Qüvvələrinin işğalı altındadır. 1994-cü ildə tərəflər atəşkəs rejiminə dair razılaşma əldə ediblər və o vaxtdan bəri ATƏT-in Minsk qrupunun himayəsi altında, Rusiya, Fransa və ABŞ-ın həmsədrliyi ilə hələ də nəticəsiz sülh danışıqları aparılır.
BMT Təhlükəsizlik Şurasının Dağlıq Qarabağ və ətraf rayonların azad edilməsinə dair qəbul etdiyi dörd qətnaməni Ermənistan bu günə qədər yerinə yetirməyib.