Qazaxıstan, Astana, 29 noyabr /Trend, müxbir A.Maratov/
Qazaxıstanda və ümumilikdə ATƏT-də səmimi qəlbdən ümid edirlər ki, təşkilatın qarşıdakı Astana sammiti Dağlıq Qarabağ münaqişəsinin sülh yolu ilə gələcək nizamlanmasını sürətləndirəcək. Bu barədə ATƏT-in fəaliyyətdə olan sədri Kanat Saudabayev bəyan edib. Məlimatı bazar ertəsi Qazaxıstan XİN-in mətbuat xidməti yayıb.
"Astana sammiti ərəfəsində ATƏT-in fəaliyyətdə olan sədri, Qazaxıstanın xarici işlər naziri Kanat Saudabayev Minsk qrupunun həmsədrlərini cari vəziyyəti və Dağlıq Qarabağ münaqişəsinin nizamlanması perspektivlərini müzakirə etmək üçün qəbul edib. Görüşdə ATƏT-in fəaliyyətdə olan sədrinin həlli uzanan münaqişələr üzrə şəxsi nümayəndəsi, səfir Anji Kaspşik də iştirak edib", - məlumatda bildirilir.
Məlumatda deyildiyi kimi, İqor Popov və Robert Bratke ATƏT-in fəaliyyətdə olan sədrini münaqişənin nizamlanması üzrə işlərin nəticələri, eləcə də ötən həftə Azərbaycan və Ermənistana səfərləri barədə məlumatlandırıblar.
"Görüş zamanı Kanat Saudabayev qeyd edib ki, Qazaxıstanda və ümumilikdə ATƏT-də təşkilatın qarşıdakı Astana sammitinin Dağlıq Qarabağ münaqişəsinin sülh yolu ilə gələcək nizamlanmasını sürətləndirəcəyinə səmimi qəlbdən ümid edirlər", - məlumatda qeyd olunub.
İki Cənubi Qafqaz ölkəsi arasında münaqişə 1988-ci ildə Ermənistanın Azərbaycana qarşı ərazi iddiası irəli sürməsi zəminində yaranıb. Azərbaycan torpaqlarının iyirmi faizi, yəni Dağlıq Qarabağ ərazisi və bu əraziyə bitişik yeddi rayon Ermənistan Silahlı Qüvvələrinin işğalı altındadır. 1994-cü ildə tərəflər atəşkəs rejiminə dair razılaşma əldə ediblər və o vaxtdan bəri ATƏT-in Minsk qrupunun himayəsi altında, Rusiya, Fransa və ABŞ-ın həmsədrliyi ilə hələ də nəticəsiz sülh danışıqları aparılır.
BMT Təhlükəsizlik Şurasının Dağlıq Qarabağ və ətraf rayonların azad edilməsinə dair qəbul etdiyi dörd qətnaməni Ermənistan bu günə qədər yerinə yetirməyib.