...

Dağlıq Qarabağ münaqişəsindəki status-kvo xeyli təhlükə törədir - Almaniya XİN

Ermənistan-Azərbaycan münaqişəsi Materials 29 Oktyabr 2011 12:41 (UTC +04:00)
Almaniya Federativ Respublikasının (AFR) xarici işlər naziri Gido Vestervelle cümə günü erməni həmkarı Edvard Nalbandyanla görüşüb.
Dağlıq Qarabağ münaqişəsindəki status-kvo xeyli təhlükə törədir - Almaniya XİN

Azərbaycan, Bakı, 29 oktyabr /Trend, müxbir E.Tariverdiyeva/

Almaniya Federativ Respublikasının (AFR) xarici işlər naziri Gido Vestervelle cümə günü erməni həmkarı Edvard Nalbandyanla görüşüb. Trend-in məlumatına görə, bu barədə şənbə günü Almaniya XİN-in rəsmi saytında yerləşdirilən məlumatda deyilir.

Danışıqlar zamanı ikitərəfli və regional məsələlər, xüsusilə də Ermənistan-Azərbaycan, Dağlıq Qarabağ münaqişəsinə toxunulub.

Vestervelle yenidən münaqişə tərəflərini kompromis əldə etməyə çağırıb. Onun sözlərinə görə, mövcud status-kvo münaqişənin eskalasiyası üçün xeyli təhlükə törədir və etimadın möhkəmləndirilməsi üzrə təcili olaraq növbəti tədbirlər qəbul etmək lazımdır. Hər iki nazir razılaşıb ki, ATƏT-in Minsk qrupu danışıqlarda mərkəzi rol oynayır və gələcəkdə proses Aİ tərəfindən daha çox dəstəklənə bilər.

İki Cənubi Qafqaz ölkəsi arasında münaqişə 1988-ci ildə Ermənistanın Azərbaycana qarşı ərazi iddiası irəli sürməsi zəminində yaranıb. Azərbaycan torpaqlarının iyirmi faizi, yəni Dağlıq Qarabağ ərazisi və bu əraziyə bitişik yeddi rayon Ermənistan Silahlı Qüvvələrinin işğalı altındadır. 1994-cü ildə tərəflər atəşkəs rejiminə dair razılaşma əldə ediblər və o vaxtdan bəri ATƏT-in Minsk qrupunun himayəsi altında, Rusiya, Fransa və ABŞ-ın həmsədrliyi ilə hələ də nəticəsiz sülh danışıqları aparılır.

BMT Təhlükəsizlik Şurasının Dağlıq Qarabağ və ətraf rayonların azad edilməsinə dair qəbul etdiyi dörd qətnaməni Ermənistan bu günə qədər yerinə yetirməyib.

Xəbər lenti

Xəbər lenti