Türkiyə, İstanbul, 25 fevral /Trend, müxbir R.Hafizoğlu/
Bu gün İstanbul şəhərində Xocalı soyqırımının 20-ci ildönümünə həsr olunmuş konfransda Türkiyənin Baş naziri Rəcəb Tayyib Ərdoğanın tədbir iştirakçılarına müraciəti oxunub.
"Xocalıda günahsız insanların öldürülməsi həqiqətən də böyük bir faciədir. Bu, bütün Türk dünyasının ortaq dərdidir", - müraciətdə deyilir.
Trend-in məlumatına görə, Ərdoğan ümidvar olduğunu bildirib ki, tarixdə bir daha belə soyqırım təkrarlanmayacaq.
"Azərbaycan xalqına başsağlığı verirəm. Faciədə ölənlərə Allahdan rəhmət diləyirəm", - müraciətdə qeyd olunur.
Qeyd edək ki, konfransda Türkiyənin ictimai xadimləri, Türkiyə Böyük Millət Məclisinin deputatları, eyni zamanda, İstanbulda təhsil alan azərbaycanlı tələbələr və Azərbaycan Milli Məclisinin deputatları iştirak edib.