Bakı. Trend:
2016-cı ilin aprelində Azərbaycan və Ermənistan qoşunlarının təmas xəttindəki gərginlikdən sonra 6 ay ərzində ATƏT-in Minsk qrupunun həmsədrləri vəziyyətin sabitləşməsi və danışıqlar prosesində irəliləyiş üçün yorulmadan çalışıb və bu səylər davam etdirilir.
Trend-in ATƏT-ə istinadən verdiyi məlumata görə, bu barədə təşkilatın fəaliyyətdə olan sədrinin şəxsi nümayəndəsi Anji Kaspşikin bəyanatında deyilir.
Bəyanatda qeyd olunur: "Adəti üzrə tərəflər təmas xəttindəki vəziyyət, o cümlədən atəşkəs rejiminin pozulması haqqında məlumatları təqdim edirlər. Bu məlumatlar həmsədrlər və ATƏT-in fəaliyyətdə olan sədri daxil olmaqla, Minsk qrupunun üzvlərinə çatdırılır. Bizim iştirakımız zamanı baş verən atəşkəs rejiminin pozulması hallarını həmişə qeydə alırıq. Əks halda yerli hərbçilərin təqdim etdiyi məlumatlara əsaslanırıq".