...

Müxalifət bloku Azərbaycan Daxili İşlər Nazirliyinə və diplomatik korpuslara müraciət ünvanlayıb

Siyasət Materials 4 Fevral 2008 12:26 (UTC +04:00)

Azərbaycan, Bakı, 04 fevral / Trend , müxbr S.İlhamqızı/ Üç müxalifət partiyasını birləşdirən Demokratiya Uğrunda İttifaq Daxili İşlər Nazirliyinə, Azərbaycanda fəaliyyət göstərən xarici ölkə səfirliklərinə və beynəlxalq təşkilatlara müraciət edib. Bu barədə bazar ertəsi Trend ə Klassik Xalq Cəbhəsi Partiyasının (KXCP) sədri Mirmahmud Mirəlioğlu məlumat verib.

Demokratiya Uğrunda İttifaqın bazar günü Bərdə rayonunda müşavirə keçirməsinə polislər tərəfindən maneçilik törədilib.

KXCP sədri Mirmahmud Mirəlioğlu, Milli Demokratiya Partiyasının sədri İsgəndər Həmidov və Azadlıq Partiyasının sədri Əhməd Oruc Bərdə rayonunda saxlanılıb, avtomobilləri müsadirə olunub, bir neçə saatdan sonra Bakıya geriyə yola salınıblar.

Mirəlioğlunun dediyinə görə, polis rəisi Bərdədə fövqəladə vəziyyət yaratdığını deyib, müxalifətçiləri isə rayona gərginlik yaratmaq üçün gəlməkdə günahlandırıb.

Mirəlioğlu bildirib ki, İttifaq bu addımı özbaşınalıq, Daxili İşlər Nazirliyinin öz səlahiyyətlərini aşması kimi qiymətləndirir. Nazirliyə ünvanlanan müraciətdə baş vermiş hadisəyə aydınlıq gətirilməsi, tədbirə maneçilik törədən polislərin bu hərəkətinə qiymət verilməsi tələb olunur. Diplomatik korpuslara ünvanlanan müraciətdə bildirilir ki, bu hadisə seçkiqabağı vəziyyətin gərginləşdiyini, ölkədə əlverişli seçki mühitinin mövcud olmadığını göstərir.

İttifaq həmçinin Bərdədə polis özbaşınalığına etiraz bəyanatı qəbul edib.

Xəbər lenti

Xəbər lenti