Azərbaycan, Bakı, 15 fevral / Trend , müxbir Q.Cəbiyev/ Azərbaycanın müxalif Müsavat Partiyası Xocalı faciəsinin ildönümü ilə bağlı "Azadlıq" meydanında mitinq keçirmək qərarından imtina edib. "Müsavatın məqsədi hakim Yeni Azərbaycan Partiyası ilə birgə mitinq keçirmək idi" cümə günü Trend ə Müsavat Partiyasının Mərkəzi İcra Aparatının rəhbəri Arif Hacılı bildirib.
Müsavat Partiyası Divanının fevralın əvvəlində keçirilən sonuncu toplantısında Xocalı faciəsinin ildönümü ilə əlaqədar tədbirlər müzakirə olunub və YAP da daxil olmaqla bütün siyasi partiyalara faciənin ildönümü ilə bağlı aksiyanın keçirilməsi təklifinə dair qərar qəbul edilib.
YAP icra katibinin müavini, millət vəkili Mübariz Qurbanlı Trend ə hakim partiyanın bu təklifi qəbul etmədiyini bildirib. Onun sözlərinə görə, Xocalı faciəsini dünyaya çatdırmaq üçün bu tipli mitinqlər ABŞ Senatının, Fransa Senatının, Rusiya Dövlət Dumasının və digər ölkələrin müvafiq qurumlarının qarşısında keçirilməlidir.
1992-ci il fevralın 25-dən 26-na keçən gecə Ermənistan Silahlı Qüvvələri keçmiş SSRİ-nin Xankəndidə yerləşən 366-cı motoatıcı alayının köməyi ilə Xocalı şəhərini işğal edərək Azərbaycan xalqına qarşı soyqırım törədiblər. Bir gecədə 613 nəfər, o cümlədən 63 uşaq, 106 qadın, 70 qoca xüsusi amansızlıqla qətlə yetirilib.
Hacılı deyib ki, belə bir mitinqin keçirilməsində məqsəd bütün siyasi partiyaların iştirakı ilə dünyaya Xocalı faciəsinin mahiyyətini çatdırmaq idi. Qərara Müsavat Partiyasının ayrıca mitinq keçirməsi məsələsi salınmayıb.
Müsavat Partiyası 1992-ci ildə yaradılıb. Partiyanın başqanı İsa Qəmbər Azərbaycan Parlamentinin eks-spikeri (1992-93-cü illərdə) və 2003-cü ildə keçirilmiş prezident seçkisində prezidentliyə namizəd olub.
YAP 1992-ci ilə o vaxt Naxçıvan Ali Məclisinin sədri olan Heydər Əliyev tərəfindən yaradılıb. Azərbaycanda 16 ildir hakimiyyətdə olan YAP-ın indiki sədri prezident İlham Əliyevdir.
Müəlliflə əlaqə saxlamaq üçün elektron ünvan - [email protected]