Azərbaycan, Bakı, 18 fevral / Trend , müxbir K.Ramazanova / Avropa Şurası Parlament Assambleyasının Müşahidə Nümayəndəliyinin üzvü Bcorn Cakobson hesab edir ki, Ermənistanda ictimaiyyətin seçki prosesinə etibar etməsini təmin etmək üçün səylər davam etdirilməlidir.
"Seçki prosesinə, xüsusilə hesablama prosesinin şəffaflığına ictimai inamı təmin etmək üçün hakimiyyətin bütün gərəkli tədbirləri görməsi lazımdır" - Cokobson Yerevandan telefonla Trend ə deyib.
Ermənistanda prezident seçkisi fevralın 19-na nəzərdə tutulub.
Ermənistanda prezident seçkisinin gedişatını müşahidə edən MDB-dən olan missiya ikinci aralıq məruzəni elan ediblər. Məruzədə deyilir ki, respublikanın Seçki Məcəlləsi Birliyin iştirakçı-ölkələrində demokratik seçkilər, seçki hüququ və azadlığı standartları haqqında Konvensiyanın əsasnamələri nəzərə alınmaqla hazırlanıb.
Ermənistanda prezident seçkisinin gedişatını 600-dən artıq beynəlxalq müşahidəçi: ATƏT-in DİİHB-dən - 316, ATƏT Parlament Assambleyasından - 53, Avropa Şurası Parlament Assambleyasından - 40, Avropa Parlamentindən - 6, MDB-dən - 166, MDB-nin Parlamentlərarası Assambleyasından - 39 müşahidəçi izləyəcək.
Seçkiyə müşahidəni həmçinin 39 yerli ictimai birlik həyata keçirəcək, onarın müşahidəçilərinin ümumi sayı 14 mindən artıqdıdr.
Çərşənbə axşamı Ermənistanda 1923 seçki məntəqəsi fəaliyyət göstərəcək.
