Azərbaycan, Bakı, 04 mart / Trend , müxbir D.Xatınoğlu/ BMT Təhlükəsizlik Şurasının İran nüvə proqramına dair Qətnamələrinin Tehranın bu sahədəki planlarına təsiri olmayacaq. "BMT Təhlükəsizlik Şurasının İrana qarşı Qətnamələri ölkənin nüvə texnologiyasının inkişafına mane ola bilməz"-deyə, İran Parlamentinin Tədqiqat Komitəsinin sədri Əhməd Təvəkküli (Ahmad Tavakkoli) Trend -ə bildirib.
BMT Təhlükəsizlik Şurası martın 3-də İrana qarşı üçüncü Qətnamə qəbul edib. BMT T Ş-nin 14 qeyri-daimi üzvü yeni Qətnamənin tətbiqinin lehinə səs verib, İndoneziya isə, bitərəf mövqe tutub.
Təvəkküli çərşənbə axşamı telefonla Tehrandan Trend ə bildirib ki, BMT TŞ-nin İran əleyhinə Qətnamələri nə hakimiyyətin siyasətində, nə də əhalinin məişətinə heç bir təsiri yoxdur. "Siyasi təzyiqlər və iqtisadi sanksiyalar İranın dinc məqsədli nüvə texnologiyasının inkişafına əngəl deyil, hətta, inkişafına səbəb olub və ABŞ-ın ölkəni təcrid etmək planı tamamilə əks nəticə verib"-deyə, parlament komitəsinin sədri bildirib.
Təvəkküli əlavə edib ki, indiyədək, MAQATE-nin İranla bağlı məruzələri ölkənin nüvə planının texniki və hüquqi baxımdan qanuni olduğunu sübut edib. " MAQATE-nin son məruzəsi bir daha açıq-aşkar rəsmi Tehranın mjvqeyini dəstəkləyərək, ölkəyə irəli sürülən ittihamları rədd etdi. Yeni
Qətnamə neytral analitik informasiyalar əsasında deyil, ABŞ-ın təzyiqi nəticəsində qəbul olunub və bu addım BMT TŞ - nin imicin böyük bir zərbədir"-deyə, İran rəsmisi bildirib.
BMT TŞ İrandan uranı zənginləşdirilməsini dayandırmağı tələb edib. 2003-cü ildən etibarən, üç il müddətində rəsmi Tehran uranın zənginləşdirilməsi planını dayandırsa da, 2006-cı ildən plan yenidən işləyir. BMT TŞ bu səbəbdən İran əleyhinə 3 Qətnamə qəbul edib. 3-cü Qətnamədə, İranın nüvə planı ilə əlaqədar 18 rəsmisinin xaricə səfərinə və 13 şirkətlə iqtisadi əlaqə qurmağa qadağa qoyulub. Həmçinin, xarici şirkətlərin İranın "Melli" və "Saderat" bankları ilə iqtisadi əlaqədə daha diqqətli olmağı, ölkəyə idxal olunan mallara kredit verməkdə, sığortalamada ehtiyatlı olmağa çağırıb. İrana idxal olunan yüklərin nəzarətdən keçirilməsi xüsusi vurğulanıb.