Azərbaycan, Bakı, 11 mart / Trend ", müxbir E.Hüseynli/ Azərbaycanın müxalif Milli İstiqlal Partiyasının (AMİP) lideri Etibar Məmmədov martın 17-18-də Gürcüstanın paytaxtı Tbilisidə səfərdə olacaq. Bu barədə çərşənbə axşamı Trend ə AMİP-in təbliğat və mətbuat katibi Əli Orucov məlumat verib. Orucov deyib ki, AMİP lideri Avropa Parlamentində olan Avropa Xalq Partiyası və Avropa Demokratları fraksiyasının təşəbbüsü ilə Tbilisidə "Cənubi Qafqazda kilsələrin rolu" mövzusunda keçirilən beynəlxalq konfransda iştirak edəcək.
Məmmədov tədbirdə "Cənubi Qafqazda siyasi vəziyyət" mövzusunda məruzə ilə çıxış edəcək. Toplantıda Avropa Xalq Partiyasının vitse-prezidenti Mariano-Jana Marinesku və Gürcüstan prezidenti Mixail Saakaşvilinin iştirak edəcəyi gözlənilir.
AMİP 1992-ci ildə yaradılan və Azərbaycanda ilk dövlət qeydiyyatına alınan partiyadır. Müxalifəti təmsil edən AMİP-in qurucusu və 2004-cü ilin sonunadək sədri Etibar Məmmədov hazırda Beynəlxalq Demokrat İttifaqının (BDİ) sədr müavinidir.