Azərbaycan, Bakı, 30 mart / Trend , K.Ramazanova / Vaşinqton hesab edir ki, Azərbaycan və Ermənistan Dağlıq Qarabağ münaqişəsinin nizamlanması ilə bağlı "təməl prinsipləri" üzrə ümumi razılığa gəlməlidir.
"Təməl prinsipləri" məsələsində razılıq əldə edilməsində irəliləmək vaxtıdır" - bazar günü Dağlıq Qarabağ münaqişəsinn nizamlanması ilə bağlı ATƏT-in Minsk Qrupunun amerikalı həmsədri Metyu Brayza Trend a bildirib.
2007-ci ilin sonlarında ATƏT-in Minsk Qrupunun həmsədrləri Azərbaycan və Ermənistana ilk dəfə olaraq Dağlıq Qarabağ münaqişəsinin nizamlanması haqqında "Təməl prinsipləri" sənədini təqdim edib.
BMT-nin Baş Assambleyası mart ayının 14-də Azərbaycanın təqdim etdiyi "Azərbaycanın işğal edilmiş ərazilərindəki vəziyyət" Qətnaməsini dəstəkləyib. Qətnamədə "Ermənistan qüvvələrinin Azərbaycan ərazisindən dərhal, tam və qeyd-şərtsiz çıxarılması"tələb olunur.
ATƏT-in Minsk Qrupunun bütün həmsədr ölkələri Qətnaməyə qarşı səs verib. Azərbaycanın BMT-dəki səfiri Aqşin Mehdiyev Trend a verdiyi müsahibəsində bildirib ki, Rusiya və Fransa "bütün vasitələrdən istifadə etdi ki, BMT-nin qətnaməni qəbulunun qarşısını alsın". Bu hadisələrdən sonra ATƏT -in Minsk Qrupunun həmsədr ölkələrinin etiraz prosedurlarını öyrənmək üçün Azərbaycan ATƏT -ə müraciət edib. Bu barədə keçən həftə jurnalistlərə xarici işlər nazirinin müavini Araz Əzimov məlumat verib.
İki Cənubi Qafqaz ölkəsiarasında münaqişə 1988-ci ildə Ermənistanın Azərbaycana qarşı ərazi iddiası irəli sürməsi zəminində yaranıb.1992-ci ildən etibarən Azərbaycan torpaqlarının 20%-i, yəni Dağlıq Qarabağ ərazisi və bu əraziyə bitişik 7 rayon Ermənistan Silahlı Qüvvələrinin işğalı altındadır. 1994-cü ildə tərəflər atəşkəs rejiminə dair razılaşma əldə ediblər və o vaxtdan bəri ATƏT-in Minsk Qrupunun himayəsi altında, Rusiya, Fransa və ABŞ-ın həmsədrliyi ilə, hələ ki nəticəsiz, sülh danışıqları aparılır.