Azərbaycan, Bakı, 01 aprel / Trend , müxbir G.Əhmədova,R.Hafizoğlu /Almaniyada qalmaqallı yazıçı Salman Rüşdinin "Şeytan Ayələri" kitabının səhnələşdirilməsi müsəlmanlarla xristianlar arasında dialoqa zərbə vura bilər. "Baş verən son hadisələr bir daha bu Avropa ictimaiyyətinin dialoqa hazır olmadığını göstərir"-deyə Səudiyə Ərəbistanından islamşünas - araşdırmaçı Əlbülvahid Əlvani Trend -a bildirib.
Türkiyə mətbuatının martın 31 -də verdiyi məlumata görə ,Almaniyada "Şeytan Ayələri" kitabının müəllifi Salman Rüşdinin əsəri əsasında tamaşa səhnələşdiriləcək. Almaniyada yaşayan müsəlmanların kütləvi aksiyalara başladığı bildirilir.
"Bu gün dünya xalqları arasında mədəni fikir birliyinə, xüsusilə də, xristianlıq və islam arasında dialoqa çox böyük ehtiyac var"-deyə, Əlvani çərşənbə axşamı Ciddədən elektron poçtla bildirib. Əlvaninin fikrincə, bu gün islam və xristian dünyası arasında mübərizə yalnız hərbi və siyasi deyil, həm də mədəni sahədə aparılır. "İslami və müqəddəs dəyərlərin qorunmasının ən gözəl yolu əsaslı şəkildə dialoqa başlamaqdır"-deyə, o qeyd edib.
Əlvani əlavə edir ki, müsəlmanlar özlərini cəmiyyətdən ayırmaqla heç bir şeyə nail ola bilməzlər.
"Rəsmi hesablamalar göstərir ki, ən çox ardıcılı olan dinlər xristianlıq və islamdır. İki din arasında sağlam münasibətlər və dialoq dünyada stabilliyin olması deməkdir"-deyə, o qeyd edib.
Ekspertin fikrincə, Salman Rüşdinin "Şeytan Ayələri" adlı əsəri səhnələşdirilməyəcək. "Şeytan ayələri" əsərinin səhnələşdirilməsi iki din arasında böyük qarşıdurmaya səbəb ola və dinlərarası dialoqu yarıda qoya bilər"-deyə, o vurğulayıb.
Böyük Britaniyanın Müsəlmanları Ictimai Işlər Komitəsinin mətbuat katibi Raza Nadim hesab edir ki, Avropada islam və dini dəyərlərin təhqir olunması yolverilməzdir. "Biz söz azadlığını dəstəkləsək də, inanırıq ki, azad söz nisbidir və ondan məsuliyyətlə istifadə edilməlidir"-deyə, Nadim çərşənbə axşamı Londondan Trend a bildirib.
Onun fikrincə, Hollandiyada Qeert Vilderin (Geert Wilder) islamı təqhir edən filminin yayımlanması və Almaniyada "Şeytan ayələri"nin səhnələşdirilməsi müsəlman əhalinin inamlarını təhqir etməklə, onları qəzəbləndirməkdən başqa bir şey deyil. "Müsəlman və xristianlar bu filmin buraxılmasına,onlar arasında parçalanma yaranmasına yol verməməlidirlər"-deyə, o qeyd edib.
Nadinin fikrincə, Vilderin çəkdiyi film və "Şeytan Ayələri"nin səhnələşdirilməsi bütün xristian aləminin mövqeyi kimi dəyərləndirilməməlidir. "İndi müsəlmanlar və xristianlar arasında dialoq aparmağın vaxtıdır"-deyə, o vurğulayıb.
Martın 27-də hollandiyalı rejissor-siyasətçi Qeert Vilders Internetdə Quranı və islami dəyərləri təhqir edən 15 dəqiqəlik film yerləşdirib.
Hindistan əsilli Salman Rüşdiyə, 1989 - cu ildə "Şeytan Ayələri" kitabını yazdığına görə, İran İslam İnqilabının dini rəhbəri Ayətullah Xomeyni tərəfindən ölüm hökmü verilib.
Məqalənin müəllifi ilə [email protected] ünvanı ilə əlaqə saxlaya bilərsiniz.
