Azərbaycan, Bakı, 15 aprel / Trend , müxbir Q.Cəbiyev/ Müxalif Azərbaycan Demokrat Partiyası (ADP) hesab edir ki, Azərbaycan cəmiyyəti etiraz mitinqlərinin keçirilməsi üçün hazır deyil. "Cəmiyyət etiraz mitinqlərində kütləvi şəkildə iştirak etməyə hazır deyil" çərşənbə axşamı Trend a ADP-nin sədr müavini Həsrət Rüstəmov bildirib.
Müsavat Partiyası Divanının aprelin 14-də keçirilən iclasında mayın 3-də aksiyanın keçirilməsi barədə qərar qəbul olunub. Partiya aksiyanı Azərbaycan hakimiyyətinin Seçki Məcəlləsinə dəyişikliklər etmək istəməməsinə və seçki kampaniyası müddətini 4 aydan 2 aya endirmək cəhdlərinə etiraz olaraq keçirməyi nəzərdə tutur. Aksiyada həmçinin son bahalaşmaya, heç bir məhkəmə qərarı olmadan vətəndaşların mülkiyyət obyektlərinin sökülməsinə və bu zaman dəyən ziyana görə təzminat ödənməməsinə qarşı şüarlar səsləndirilməsi də planlaşdırılır.
Rüstəmov bildirib ki, Müsavatın tələbləri haqlıdır. "Amma bu məsələlər yetərincə ictimailəşmədiyi üçün dəstək qazanmayacaq" - deyən ADP funksioneri əlavə edib ki, belə bir şəraitdə aksiya keçirmək ümumilikdə mitinq taktikasının effektivliyini aşağı salır. Onun fikrincə, aksiya elan olunursa, hakimiyyətin icazə verib-verməməsindən asılı olmayaraq keçirilməlidir. Əks halda bu, pessimizm əhval-ruhiyyəsi yaradır.
Sağ təmayüllü partiya olan ADP 1991-ci ildə Cəlaloğlu tərəfindən təsis edilib. Partiya ötən ilin yanvarınadək iqtidara qarşı radikal müxalif mövqedə olub. Ötən ilin yanvarında ADP-nin hakimiyyətlə dialoq qurulması ilə bağlı yeni siyasi kursu qəbul edilib. Buna etiraz olaraq keçmiş sədr Rəsul Quliyev və tərəfdarları ADP-dən imtina edərək özlərinin Açıq Cəmiyyət Pariyasını (ACP) yaradıblar.
Məqalə müəllifi ilə əlaqə ünvanı: [email protected]
