Azərbaycan, Bakı, 17 aprel / Trend , müxbir K.Zərbalıyeva/ Respublikada cinayətlərin böyük əksəriyyəti işsizlər tərəfindən törədilir. Dövlət Statistika Komitəsindən verilən məlumata görə, cari ilin ilk üç ayında respublikada 4827 cinayət hadisəsi qeydə alınıb. Bu isə ötən ilin müvafiq dövrü ilə müqayisədə 17,3 faiz artıqdır.
Cinayətlərin 82 faizi işsizlər və heç bir yerdə oxumayan şəxslər tərəfindən törədilib.
Hesabat dövründə aşkar edilmiş 3760 hüquq pozucusunun 3049-u cinayət məsuliyyətinə cəlb olunub. Onların 9 faizi əvvəllər cinayət törətmiş şəxslər, 13 faizi qadınlar, 3 faizi yetkinlik yaşına çatmayanlar olub. Cinayətlər nəticəsində 1945 nəfər xəsarət alıb ki, onların 57 faizi kişi, 43 faizi qadındır.
Qeydə alınan cinayətlərin 35 faizi ictimai təhlükəsizlik, 31 faizi şəxsiyyət, 5 faizi dövlət hakimiyyəti əleyhinə olanlar, 30 faizi iqtisadi sahədə baş verən cinayətlərdir.
Cinayətlərin 23-ü xüsusi ilə ağır, 526-sı ağır, 2439-u az ağır, 1839-u böyük ictimai təhlükə törətməyənlərdir.
İlin ilk üç ayında respublikda 57 qəsdən adamöldürmə və qəsdən adam öldürməyə cəhd, 55 qəsdən sağlamlığa ağır zərər vurma, 676 oğurluq, 388 dələduzluq faktı qeydə alınıb.
Məqalənin müəllifi ilə [email protected] ünvanı ilə əlaqə saxlaya bilərsiniz