Azərbaycan, Bakı, 05 may/ Trend , müxbir İ.Əlizadə/ Azərbaycan müxalifəti icazəsiz etiraz aksiyalarına başlaya bilər. "Sərbəst toplaşmaq azadlığı haqqında" qanunun tələbləri yerinə yetirilməyəcəksə və Bakı Şəhər İcra Hakimiyyəti aksiyalara icazə verməyəcəksə, onda seçicilərlə görüşmək üçün icazəsiz aksiyalara başlayacağıq", -deyə bazar ertəsi Trend -a açıqlamasında müxalifəti təmsil edən Ümid Partiyasının sədri, deputat İqbal Ağazadə bildirib.
"Sərbəst toplaşmaq azadlığı haqqında" qanuna görə, təşkilatçılar kütləvi etiraz aksiyalarının keçirilməsi ilə bağlı Bakı Şəhər İcra Hakimiyyətinə əvvəldən məlumat verməlidirlər və aksiyanın yerini və vaxtını razılaşdırmalıdırlar. 2005-ci ilin parlament seçkilərindən sonra Bakı Şəhər İcra Hakimiyyəti müxalifətin təyin etdiyi aksiyaların əksəriyyətinə icazə verməyib. Müxalifət əvvələr dəfələrlə icazəsiz kütləvi aksiyalar keçirib.
Ağazadə qeyd edib ki, icazəsiz aksiyaların keçirilməsi prezident seçkiləri öncəsi daha aktual olacaq: "Hələlik Ümid Partiyasında aksiyaların keçirilməsi ilə bağlı müzakirələr aparılmır. Lakin gələcəkdə kütləvi etiraz aksiyalarının keçirilməsi haqqında qərar qəbul etsək, Bakı Şəhər İcra Hakimiyyətinin icazə verib-verməməsindən asılı olmayaraq aksiyanı təyin etdiyimiz ünvanda keçirəcəyik".
Müsavat Partiyası Mərkəzi İcra Aparatının rəhbəri Arif Hacılı bildirib ki, hakimiyyətin müxalifətin aksiyalarına icazə verməməsi icazəsiz mitinq və yürüşlərin keçirilməsini aktuallaşdırıb: "İcazəsiz aksiyaların keçirilməsi prezident seçkiləri dövründə daha da aktuallaşcaq. Müsavat Partiyasının icazəsiz aksiyalar keçirməsi mümkündür".
Azərbaycan Demokrat Partiyasının sədri Sərdar Cəlaloğlu hesab edir ki, aksiyaların keçirilməsi üçün Bakı Şəhər İcra Hakimiyyətindən icazə almağa ehtiyac yoxdur. Çünki qanuna görə, təşkilatçılar icra hakimiyyətini xəbərdar etməklə, aksiyalar keçirə bilərlər: "Bakı Şəhər İcra Hakimiyyətinin qərarından asılı olmayaraq, qanun icazə verdiyi yelərdə aksiyalar keçirəcəyik. Prezident seçkiləri yaxınlaşdıqca, belə aksiyaların keçirilməsi zəruri olacaq".
Azərbaycan Xalq Cəbhəsi, Vətəndaş və İnkişaf və Liberal partiyalarının təmsil olunduğu "Azadlıq" blokunun həmsədri Əli Əliyev bildirib ki, blokun icazəsiz aksiyalar keçirəcəyi istisna deyil.
"Azərbaycanda vəziyyətin nədən ibarət olduğunu öyrəndikdən sonra icazəsiz aksiyalara başlaya bilərik. 2005-ci ilin parlament seçkilərindən sonra cəmiyyətdə durğunluq yaranıb və bu vəziyyət davam edir. Hesab edirəm ki, hazırkı mərhələdə icazəsiz aksiyaların keçirilməsi də cəmiyyətdə yaranmış durğunluğu aradan qaldıra bilməyəcək. Lakin prezident seçkiləri yaxınlaşdıqca, icazəsiz aksiyalar aktuallaşacaq", -deyə Əliyev əlavə edib.
Daxili İşlər Nazirliyinin mətbuat xidmətindən bildiriblər ki, polis Bakı Şəhər İcra Hakimiyyəti ilə razılaşdırılmayan və icazə verilməyən aksiyaların qarşısını alacaq.
Məqalə müəllifi ilə əlaqə ünvanı: [email protected]