Azərbaycan, Bərdə, 07 may / Trend , müxbir Ş. Cəliloglu/ Azərbaycanın cənub-qərb bölgəsi sayılan Bərdə rayonunda narkotiklərin qanunsuz istifadəsi, satışı ilə məşğul olanların sayı artıb. Bu barədə çərşənbə günü Trend a Bərdə rayon polis şöbəsinin rəisi Ağalar Məhərrəmov məlumat verib.
Bu ilin dörd ayında ötən ilin müvafiq dövrü ilə müqayisədə narkotiklərin qanunsuz dövriyyəsi ilə bağlı cinayət hadisəsi 26 fakt artıb. Ötən ilin yanvar-aprel aylarında bununla bağlı cəmi 7 fakt aşkarlanıb.
Məhərrəmov deyib ki, hesabat dövründə narkotiklərin qanunsuz dövriyyəsi ilə bağlı 33 cinayət faktı qeydə alınıb. Bu faktların 21-i narkotiklərin satışı ilə bağlıdır. Onun sözlərinə görə, yanvar-aprel ayında Bərdədə 96 cinayət hadisəsi qeydə alınıb ki, onlardan 94-nün üstü isti izlərlə açılıb. Qeydə alınan cinayətlərin 17-si vətəndaşların şəxsi əmlakının oğurlanması, 7-si xuliqanlıq, biri qəsdən adamöldürmə, 10 fakt isə yol qəzası ilə bağlı olub.
Bərdə paytaxt Bakıdan 320 kilometr cənub-qərbdə yerləşir.
Məqalə müəllifi ilə əlaqə ünvanı: [email protected]
