Azərbaycan, Bakı,08 may / Trend , müxbir K. Zərbalıyeva/ Bakının Xətai rayon məhkəməsi Seçki Monitorinq Mərkəzinin qeydiyyatının ləğvi barədə yekun qərarını mayın 12-də elan edəcək.
SMM-in icraçı direktoru Anar Məmmədli cümə axşamı Trend a bildirib ki, prosesdə cavabdehin nümayəndəsi İntiqam Əliyev vəsatət verərək, mərkəzin təsis sənədlərini qəbul etmiş Ədliyyə Nazirliyinin məsul vəzifəli şəxslərinin şahid kimi dindirilməsi barədə vəsatət verib.
Məhkəmə vəsatəti, eləcə də Əliyevin Ədliyyə Nazirliyinə qarşı verdiyi qarşılıqlı iddia ərizəsini qəbul etməyib.
Hər iki tərəfi dinləyən məhkəmə yekun qərar qəbul etmək üçün müşavirəyə gedib.
Ədliyyə Nazirliyinin Qeydiyyat və Notariat Baş İdarəsi Xətai rayon məhkəməsinə müraciət edərək, təşkilatın qeydiyyatının etibarsız hesab edilməsi və ləğv olunması üçün müraciət edib. Mayın 5-də iddia ilə bağlı hazırlıq iclası keçiriləcək.
SMM qeydiyyata alınmaq üçün təsis sənədlərini ilk dəfə 2006-cı il martın 14 - də Ədliyyə nazirliyinə təqdim edib.
Nazirliyin müvafiq idarəsi texniki səbəbləri əsas gətirərək, təsis sənədlərini qeydiyyata almayıb və SMM-in dövlət qeydiyyatına alınmaq üçün müraciətindən 5 dəfə imtina olunub.
Bu ilin fevralında isə, SMM dövlət qeydiyyatına alınıb.
Nazirlik SMM-in qeydiyyatının ləğvi barədə iddiasını təşkilatın təsis sənədlərində təsisçilər barəsində məlumatların qeyri-müəyyən olması, təşkilatın hüquqi ünvanının dəyişdirilməsi barədə məlumatın nazirliyə bildirilməməsi, SMM-in Azərbaycanın 8 şəhərində yerləşən nümayəndəlikləri barədə məlumatların dövlət reyestrinə daxil edilməməsi ilə əsaslandırıb.
Təşkilatın həmtəsisçisi Anar Məmmədli bildirib ki, Ədliyyə Nazirliyinin göstərdiyi məsələlər SMM-in qeydiyyatının etibarsız hesab olunması və ləğv edilməsi üçün əsas ola bilməz.
Müəlliflə əlaqə saxlamaq üçün elektron ünvan - [email protected]
