Azərbaycan, Bakı, 12 may / Trend , müxbir R.Hafizoğlu/ Livanda "Hizbullah" təşkilatı ilə digər müxalif qüvvələr arasında baş vermiş qarşıdurmada Azərbaycan vətəndaşları xəsarət almayıblar. "Livanda baş verən son hadisələrdə Azərbaycan vətəndaşları xəsarət almayıb" - deyə Azərbaycanın Beyrutdakı fəxri konsulu Nəzih Qassub Trend -a bildirib.
Livan KİV-in verdiyi məlumata görə, mayın 10-dan etibərən Beyrutda "Hizbullah" təşkilatı ilə Livan hökuməti arasında baş verən qarşıdurma nəticəsində 11 nəfər həlak olub.
"Ölkəni tərk etmək üçün bir çox azərbaycanlı ailə konsulluğa müraciət etsə də, hələ ki, heç kim Livanı tərk etməyib" - deyə Qəssub bazar ertəsi Beyrutdan telefonla bildirib.
Fəxri konsulun sözlərinə görə, Livanı bu vaxta qədər yalnız bəzi küveytli və Səudiyyə Ərəbistanından olan ailələr tərk edib.
Qəssubun sözlərinə görə, Beyrutun mərkəzi yolları hələ də bağlı olsa da, bəzi küçələrdə artıq nəqliyyatın işi bərpa edilib. "Livandakı vəziyyət stabilləşməyə doğru gedir, lakin bir çox yerlərdə vəziyyət gərgin olaraq qalır"-deyə o bildirib.
Livan KİV-i "Hizbullah" təşkilatının ölkədəki ərzaq bahalaşması ilə bağlı etirazlardan istifadə edərək ölkənin hava limanını ələ keçirdiyini və hökumətyönlü telekanallardan birinin ofisini yandırdığını
bildirib. Beyrut hava limanı hələ də "Hizbullah"ın nəzarəti altındadır.
Məqalənin müəllifi ilə [email protected] ünvanı ilə əlaqə saxlaya bilərsiniz.
