Azərbaycan, Bakı, 20 may/ Trend , müxbir C.Babayeva/ Müxalifət partiyalarının gənclər təşkilatlarının qeyri-formal "Biz" koalisiyası Azərbaycan Xalq Cümhuriyyətinin 90 illik yubileyi ilə əlaqədar siyasi liderlərin müraciətini gənclərə çatdıracaq. Bu barədə çərşənbə axşamı Trend -a koalisiyada təmsil olunan Azərbaycan Gənclər Platformasının baş koordinatoru Nurəddin Babayev məlumat verib.
Mayın 28-də Azərbaycan Xalq Cümhuriyyətinin yaranmasının 90 illiyi tamam olur.
"Biz" koalisiyasında Azərbaycanın Müsavat, Liberal, Demokrat, Klassik Xalq Cəbhəsi, Milli İstiqlal partiyalarının gənclər təşkilatları, Gənclər Platforması və müstəqil gənclər təşkilatları təmsil olunur. Koalisiyanın təsis olunmasında əsas məqsəd Azərbaycanın demokratik inkişafında gənclərin rolunu artırmaqdır.
Babayevin sözlərinə görə, "Biz" koalisiyası yubileylə əlaqədar min ədəd CD hazırlayıb.
"Həmin CD-lərə AXC-nin 90 illik yubileyi ilə əlaqədar Azərbaycanın siyasi liderlərinin gənclərə müraciəti daxil olunub",- deyə Babayev bildirib.
Babayevin bildirdiyinə görə, hazırlanmış disklər 28 May ərəfəsində Bakının mərkəzində yerləşən ali məktəblərin tələbələrinə paylanacaq.
"Disklərdə AXC-nin yaranması tarixi, qurucuları haqqında məlumatlar, Məmmədəmin Rəsulzadənin Azərbaycan gəncliyinə müraciəti də əks olunub",- deyə Babayev qeyd edib.
Məqalə müəllifi ilə əlaqə saxlamaq üçün ünvan - trend
