Azərbaycan, Bakı, 24 may / Trend , müxbir E.Babayev/ Azərbaycan müxalifətinin boykot taktikası nə daxildən, nə də xaricidən dəstəklənməyəcək. "Daxildə müxalifət zəifdir, imkanları məhduddur, xaricdə isə, boykot taktikası birmənalı olaraq qəbul olunmur və beynəlxalq qurumlar seçkidə iştirakın tərəfdarıdır" -şənbə günü Trend a müstəqil politoloq Rasim Musabəyov bildirib.
Trend "un arayışı: Azərbaycanda prezident seçkisi oktyabrın 15-də keçiriləcək. İndiyədək Müsavat Partityasının başqanı İsa Qəmbərin, ADP sədri Sərdar Cəlaloğlunun, Yaşıllar Partiyasının sədri Mais Güləliyevin namizədliyi, təmsil olunduqları partiyalar tərəfindən irəli sürülüb. Bundan başqa, Azərbaycan Naminə İctimai Forumun rəhbəri Eldar Namazov müstəqil şəkildə namizədliyini irəli sürüb. Hakim Yeni Azərbaycan Partiyası isə, prezident İlham Əliyevin namizədliyini irəli sürmək niyyətindədir. Üç müxalifət partiyasını (Xalq Cəbhəsi, Vətəndaş və İnkişaf, Liberal) təmsil edən "Azadlıq" bloku isə, seçkini boykot etmək fikrindədir.
Musabəyovun fikrincə, mövcud reallıqlar hakimiyyətin üstün mövqedə olduğunu göstərir. Bu reallığı dəyişməyin yeganə yolu seçkidə iştirakdır. "Seçkilərdə iştirak yeganə mübarizə üsuludur. Yalnız seçkidə iştirak etməklə, cəmiyyəti canlandıra, öz mövqeyini cəmiyyətə çatdıra və vəziyyəti dəyişməyə nail olmaq mümkündür" -deyən Musabəyov onu da bildirib ki, Azərbaycanda mövcud qanuvericilik aktiv boykota imkan vermir. Seçki kampaniyası dövründə vətəndaşlar seçkidə iştirak etməməyə çağırıla bilməz. Yəni hər hansı partiyanın boykot addımı seçkidə iştirak etməməkdən o tərəfə keçməyəcək.
Məqalə müəllifi ilə əlaqə ünvanı: [email protected]
