Azərbaycan, Bakı, 27 may / Trend , müxbir C.Babayeva/ Beş müxalifət partiyasının təmsil olunduğu müxalifətin Məşvərət Şurasının ("beşlər") Seçki Məcəlləsinə əlavə və dəyişikliklərlə bağlı bütün müxalifət düşərgəsinin mövqeyini özündə əks etdirən vahid sənədi hazırlaması mümkün olmayıb. Bu barədə çərşənbə axşamı Trend -a Şurada təmsil olunan Azərbaycan Demokrat Partiyasının (ADP) sədr müavini Taliyət Əliyev məlumat verib.
Ötən il yaradılan Məşvərət Şurasında Azərbaycan Demokrat, Müsavat, Tərəqqi, Milli İstiqlal partiyaları və "Azərbaycan Naminə" İctimai Forum təmsil olunur.
Əliyevin sözlərinə görə, "Azadlıq" bloku "beşlər"lə bir mövqedən çıxış etməkdən imtina edəndən sonra, vahid sənədin hazırlanmasına ehtiyac qalmayıb.
"Seçki Məcəlləsi ilə bağlı ölkənin aparıcı müxalifət qurumları - "Azadlıq" bloku və "beşlər" arasında fikir ayrılığı olduğundan, ortaq mövqedən çıxış etmək mümkün deyil",- deyə Əliyev qeyd edib.
"Beşlər"in Seçki Məcəlləsi ilə bağlı təkliflərinin bir il bundan əvvəl Parlamentə, beynəlxalq təşkilatlara təqdim etdiyini bildirən Əliyev onların heç birinin nəzərə alınmadığını vurğulayıb.
Əliyevin fikrincə, Parlamentdə qəbul olunması gözlənilən Seçki Məcəlləsinin müddəaları müxalifətin prezident seçkisinə qatılmamasına yönəlib. "Lakin bütün bunlara baxmayaraq, ADP prezident seçkisində iştirakın tərəfdarıdır", -deyə o qeyd edib.
Məqalə müəllifi ilə əlaqə saxlamaq üçün ünvan - trend
