Azərbaycan, Bakı, 05 iyun/ Trend , müxbir E.Babayev/ Azərbaycanda yeni siyasi partiyanın yaranması istiqamətində iş aparılır. "Qarışdan gələn prezident seçkisinə qədər partiyanın elan olunması planlaşdırılır", - deyə cümə axşamı Trend -a Azərbaycan Demokrat Partiyasının (ADP) keçmiş funksioneri Aydın Quliyev bildirib.
Trend -un arayışı: Quliyev uzun müddət ADP-nin ideologiya katibi vəzifəsində çalışıb. O, bu ilin aprelində təsis olunan sağ mərkəzçi, müxalifətyönlü Açıq Cəmiyyət Partiyasının formalaşmasında iştirak edib. ACP-nin lideri Azərbaycanın eks-spikeri, hazırda mühacirətdə yaşayan Rəsul Quliyevdir. Bu ilin fevralınadək ADP-nin sədri olmuş Quliyev və onun tərəfdarları ADP-nin iqtidarla dialoqa getmək və radikallıqdan imtina ilə bağlı qərarına etiraz edərək özlərinin Açıq Cəmiyyət Partiyasını yaradıblar. Partiyanın yaranmasından bir neçə ay sonra Quliyev təşkilat rəhbərliyi ilə aralarında yaranan narazılığa görə ACP-ni tərk edib.
Quliyev bildirib ki, hazırda cəmiyyətdə tanınmış siyasətçi həmfikirləri ilə siyasi partiyanın yaradılması ilə bağlı müzakirələri davam etdirir. "Müzakirələr zamanı bir qisim siyasi yönümlü qeyri-hökumət təşkilatının yaranmasını istəyir. Amma çoxluq siyasi partiyanın yaradılmasının tərəfdarıdır. Bu heç də fikir ayrılığı yox, sağlam diskussiyadır. Mən özüm çoxluğun rəyi ilə razılaşacağam", - deyən Quliyev vurğulayıb ki, müzakirələr yaxın vaxtlarda yekunlaşacaq. Quliyev siyasi fəaliyyətlə aktiv şəkildə məşğul olduqdan sonra rəhbərlik etdiyi "Bakı Xəbər" qəzetinin baş redaktor vəzifəsindən gedə biləcəyini də istisna etməyib. O, qəzetin siyasi qurumlarla bağlı olmayan, müstəqil qəzet olması üçün mümkün addımları atacağını qeyd edib.
Azərbaycanda hazırda 52 siyasi partiya dövlət qeydiyyatına alınıb.
Məqalə müəllifi ilə əlaqə ünvanı: [email protected]