Azərbaycan, Bakı, 06 iyun / Trend , müxbir S.İlhamqızı, R.Hafizoğlu/ Türkiyədə dindar qadınların dövlət idarələri və təhsil müəssisələrinə başıbağlı girməsinə qoyulan qadağanın qüvvədə saxlanılması qanun pozuntusudur və dünyəvi deyil, siyasi xarakter daşıyır.
"Türkiyənin ən ali qanınverici orqan qanunları pozdu" - deyə, türkiyəli hüquq müdafiəçisi Elif Koşaroğlu Trend -a bildirib.
Türkiyədə 20 ildən çoxdur dindar qadınların dövlət idarələrinə, təhsil müəssisələrinə baş örtüyündə daxil olmasına qoyulan qadağanın götürülməsi üçün Konstitusiya Məhkəməsinə müraciət olunmuşdu. İyunun 5-də Konstitusiya Məhkəməsi müraciətə baxıb və qadağanı qüvvədə saxlayıb.
"20 ildən artıqdır başörtüyünə qoyulan qadağanın heç bir hüquqi əsası yoxdur"- deyə, Koşaroğlu cümə günü İstanbuldan telefonla bildirib.
Hüquq müdafiəçisi hesab edir ki, Türkiyədəki ifrat dünyəvilik tərəfdarları baş örtüyünə olan qadağanı yenidən tətbiq etməklə, ölkəni böhrana sürükləyirlər.
"Türkiyədə bu qadağanın qeyri-qanuni şəkildə davam etməsi ölkənin elmi potensialına da zərbədir" - deyə, o, əlavə edib. Ekspertin fikrincə, Konstitusiya Məhkəməsinin baş örtüyünü qadağan edən qərarının arxasında Atatürk prinsiplərinin qorunması deyil, siyasi sifariş dayanır.
"Türkiyə qanunvericiliyinə görə, parlamentin qəbul etdiyi qərarların hər hansı bir məhkəmə tərəfindən ləğv edilməsi qeyri-qanunidir"-deyə, Koşaroğlu bildirib.
Onun fikrincə, bəzi siyasi dairələr hicaba qadağanı davam etdirməklə, dindar əhalini radikallığa təhrik etmək niyyətindədirlər.
"Bir-birindən fəqli olsalar da, mahiyyət etibarilə, Türkiyədə dindar xanımlarların təhsil almasına qadağa tətbiq edənlərlə "Taliban" rejimi arasında oxşar cəhətlər çoxdur " - deyə Koşaroğlu bildirib.
Türkiyənin "Dünyabulteni" İnformasiya Agentliyinin direktoru, politoloq Akif Əmrə isə, hesab edir ki, Konstitusiya Məhkəməsinin parlamentin qərarını dəyişməsi kiçik dövlət çevrilişi deməkdir.
"Təhsil müəssisələrində baş örtüyünə qoyulan qadağanın davam etdirilməsi Türkiyənin gələcəyini təhlükəyə atır"- deyə, Əmrə cümə günü İstanbuldan elektron poçtla Trend - a bildirib.
O, hesab edir ki, dövlət bütün vətəndaşlarının hüqüqlarını müdafiə etməlidir. Dindar xanımlar da, digələri kimi, ölkənin tam hüqüqlu vətəndaşlarıdırlar - deyə ekspert əlavə edib.
Türkiyəli islamşünas tədqiqatçı Əhmət Taşgətirən isə, hesab edir ki, Konstitusiya Məhkəməsinin qərarı siyasi xarakter daşıyır.
"Təəssüf ki, əhalisinin 75 faizindən çoxu baş örtüyünə sərbəstlik verilməsinin tərəfdarı olan ölkədə bu, qadağan edilir"- deyə, Taşgətirən cümə günü İstanbuldan Trend -a bildirib.
O, hesab edir ki, Konstitusiya Məhkəməsi tərəfindən qadağanın saxlanılması istər-istəməz ölkə vətəndaşlarının qütbləşməsinə səbəb olacaq.
"Türkiyədə Konstitusiya Məhkəməsinin baş örtüyü əleyhinə qərarından sonra, dindar xanımlar Azərbaycanda və ya ərəb ölkələrində təhsil almağa üstünlük verəcəklər"-deyə o, bildirirb.
Azərbaycanın hüquq müdafiəçisi, Dini Etiqad və Vicdan Azadlığını Müdafiə Mərkəzinin rəhbəri İlqar İbrahimoğlu isə, hesab edir ki, Türkiyə Konstitusiya Məhkəməsinin qərarı hər mənada irticaçı və hüquqa ziddir: "Bunun qəbul edilməsi, əslində, türk toplumunu demokratiya və insan haqları standartlarından təcrid etmək deməkdir" - deyə İbrahimoğlu cümə günü Trend -a bildirib.
Onun fikrincə, hicab - vicdan azadlığının tərkib hissəsidir və burada dünyəviliyi bəhanə gətirmək heç bir məntiqə sığmır. Hüquq müdafiəçisi hesab edir ki, Qərbdə dünyəvilik iddiasından, əslində, antidemokratik mahiyyəti gizlətmək üçün istifadə olunur.
Türkiyədə Konstitusiya Məhkəməsinin təhsil və dövlət müəssisələrində hicaba qadağanı qüvvədə saxlamasına ölkənin prezidenti Abdullah Gül "Bu, hüquqi prosesdir. Başqa heç nə əlavə etmək istəmirəm" - şəklində münasibət bildirib.
Türkiyənin dövlət naziri və baş nazirin müavini Cəmil Çiçək Konstitusiya Məhkəməsi qərarının hakim partiyanın (AKP) bağlanması iddiasına aidiyyatı olmayan, fərqli məsələlər olduğunu deyib.
Türkiyə Silahlı Qüvvələrinin rəhbəri, ordu generalı Yaşar Böyükanıt Türkiyənin hüquqi, demokratik, dünyəvi dövlət olduğunu vurğulayaraq, qanunlara, Konstitusiya Məhkəməsinin qərarına hamının hörmət etməli olduğunu deyib. Hava Qüvvələri komandanı, general Aydoğan Babaoğlu da Konstitusiya Məhkəməsinin qərarını dəstəkləyib.
Məqalə müəllifi ilə əlaqə saxlamaq üçün elektron ünvan [email protected]