Az?rbaycan, Bakı, 17 iyun, Trend / müxbir D.Xatınoğlu, G.Əhmədova/ NATO Əfqanıstanda rolunu yalnız sülhü təmin etməkdə görür. Lakin bir çox analitiklər hesab edirlər ki, NATO nəinki sülhü dəstəkləyir, hətta bu qüvvələrin Əfqanıstanda qalmasına, Talibanın Pakistan və Əfqanıstan hakimiyyətləri ilə sülh bağlamasına mane olur. "NATO qüvvələri Əfqanıstanı tərk etməyincə, hər iki ölkədə sülhün yaranması mümkün deyil" - deyə, Pakistanın Alternativ Həll İnstitutunun icraçı direktoru Xəlil Əhməd Trend -a bildirib.
Əfqanıstan Prezidenti Həmid Kərzai bildirib ki, rəsmi Kabil Pakistandakı Talibana Əfqanıstanın təhlükəsizliyini pozmasına imkan verməyəcək. BBC-nin iyunun 15-də yaydığı məlumata əsasən, Kərzai rəsmi Kabilin Pakistandakı Taliban qüvvələrinə qarşı hərbi əməliyyat həyata keçirəcəyini bildirib: "Əfqanıstanın səbri daşıb" - deyə, prezident Kərzayi Pakistan Talibanının rəhbərləri Molla Ömər və Beytullah Məhsuda xəbərdarlıq edib.
"Əfqanıstan və Pakistan sərhədinin hər iki tərəfində eyni kökdən olan insanlar yaşayır. Ona görə də, terror problemini sərhəddin yalnız bir tərəfində həll etmək çətindir" - deyə, Əhməd bazar ertəsi İslamabaddan elektron poçtla bildirib. Onun fikrincə, ABŞ höküməti və müttəfiq dövlətlər bu ərazidə danışqlar aparmadan terrorizm problemini həll edəcəklərini düşünürlərsə, deməli, xəyal dünyasında yaşayırlar.
Pakistanlı ekspertinin fikrincə, gec-tez ABŞ terroçularla danışıqlar masası arxasına oturmalı olacaq. "Bu dialoq Əl-Qaidə ya başqa qruplarla ola bilər. Çünki bu təşkilatları məhv etmək artıq mümkün deyil, onları zəiflətmək üçün başqa yollar tapılmalıdır. Əlbəttə, Qərbin bu regionda öz maraqları və öz siyasəti var, ona görə də öz oyunlarına daha çox aktyor cəlb etmək istəyir. İndiki ssenaridə, məncə, heç bir perspektiv yoxdur"- deyə, Əhməd hesab edir.
"Mən inanıram ki, Pakistan hökümətinin Talibanla danışıqları yalnız ABŞ-ın Əfqanıstandan geri çəkilməsindən sonra mümkün olacaq",- deyə digər pakistanlı ekspert Tariq Rəhman Trend -a telefonla İslamabaddan bildirib.
Onun fikrincə, hazırda Talibana danışıqlar yolunu təklif etmək lazımdır.
"Lakin talibançıların Pakistanda məktəbləri, SD dükanlarını və digər obyektləri yandırmasından sonra, inanmıram ki, danışıqlarda bir uğur əldə olunsun. Talibançılar danışıqların getdiyi ərazilərin hüdüdlarından kənarda da öz qayda-qanunlarını diktə etmək istəyirlər" - deyə Rəhman əlavə edib.
Ekspertə görə, hər bir problem ictimaiyyətə açıqlanmalı, hərtərəfli işıqlandırılmalıdır. Yalnız bundan sonra, Talibana birbaşa xəbərdarlıq edilməlidir ki, o, ictimai asayişi pozmasın. Bu baş verməsə, Taliban yenidən Pakistana silahlı müdaxilə edəcək" - deyə, Rəhman bildirib.
Keçən həftə ABŞ hərbçiləri Pakistanın şimalında yerləşən Taliban qərargahını bombardman ediblər. Bu hücum Pakistanın 11 hərbçisinin ölümü ilə nəticələnib. İki ay bundan əvvəl ABŞ-ın kəşfiyyat orqanları Pakistanın Daxili Kəşfiyyat Xidməti İdarəsini (İSİ) Taliban qüvvələri ilə əməkdaşlıqda günahlandırmışdı. Rəsmi İslamabad bu ittihamı rədd edərək, ABŞ qüvvələrinin Pakistanın sərhəd zonalarına hücumunu pisləyib. Aprel ayında Talibanın Pakistandakı rəhbəri Beytullah Məhsud rəsmi İslamabadla sülh bağladığını desə də, Əfqanıstanda cihadı davam etdirəcəyini bildirmişdi. Bundan əvvəl rəsmi Kabil Pakistan hakimiyyətinin Taliban rəhbəri Məhsudla dialoq aparmasını dəfələrlə tənqid edərək, bu addımı Əfqanıstanın təhlükəsizliyini pozmaq cəhdi kimi qiymətləndirib.