Azərbaycan, Bakı, 25 iyun/ Trend , müxbir E.Babayev / Müxalif "Azadlıq" blokunun üzvü olan Vətəndaş və İnkişaf Partiyası (VİP) qarşıdan gələn prezident seçkisi ilə bağlı ayrıca müzakirələr aparacaq. "Yaxın günlərdə partiyanın Siyasi Şurası keçiriləcək və seçkiyə gedib-getməməklə bağlı qərar veriləcək", - deyə çərşənbə günü Trend -a VİP sədri Əli Əliyev bildirib.
Trend -un arayışı: Azərbaycanda prezident seçkisi oktyabrın 15-də keçiriləcək. "Azadlıq" blokunun Sədrlər Şurası bir neçə həftə öncə seçkiləri boykot edəcəyi barədə bəyanat verib. Blok siyasi məhbus hesab etdikləri şəxslərin, həbsdə olan 3 jurnalistin azadlığa buraxılmasını, seçki komissiyalarının paritet əsasda formalaşmasını, sərbəst toplaşmaq azadlığı ilə bağlı problemlərin həllini tələb edir.
Əliyev bildirib ki, boykotla bağlı bəyanat yaxın zaman kəsiyində blokun Məclisində müzakirə ediləcək. "Məclisdən öncə isə bizim Siyasi Şurada müzakirələr olacaq. Partiya sədri kimi burada verilən qərara tabe olacağam", - deyən Əliyevin sözlərinə görə, partiya üzvlərinin bir qismi boykot taktikasına fərqli yanaşır. Onların fikrincə, seçki təbliğatının verdiyi imkanlardan istifadə edib, cəmiyyətə mesajlar vermək olar. "Seçkiyə münasibət birmənalı deyil. Onu da bildirim ki, bizim üçün VİP olaraq əsas prioritet 2010-cu il parlament seçkiləridir", - deyə o əlavə edib.
"Azadlıq" blokunda üç müxalifət partiyası - Azərbaycan Xalq Cəbhəsi (AXCP), Liberal (ALP), Vətəndaş və İnkişaf (VİP) partiyaları təmsil olunur.
Məqalə müəllifi ilə əlaqə ünvanı: [email protected]