Azərbaycan, Bakı, 25 iyun / Trend , müxbir S.İlhamqızı/ ABŞ Dövlət Katibi müavininin köməkçisi Metyu Brayza hesab edir ki, Türkiyədə siyasi mübahisələrin bir partiyanın bağlanması ilə nəticələnməsi uğursuzluq olardı. Bu barədə Türkiyənin Anadolu Agentliyi məlumat yayıb.
Türkiyədə müxalifətçi Cümhuriyyət Xalq Partiyası və Milliyətçi Hərəkat Partiyası hakim Ədalət və İnkişaf Partiyasının bağlanması tələbi ilə Konstitusiya Məhkəməsində iddia qaldırıblar. Onlar AKP-ni dünyəviliyə qarşı çıxmaqda günahlandırırlar.
AKP dövlət və təhsil müəssisələrində baş örtüyünə qoyulan qadağanın aradan qaldırılmasına çalışır.
Brayza bildirib ki, Türkiyədə siyasi partiyanın fəaliyyətinin dayandırılması Avropa Birliyi standartlarına da uyğun deyil: "Türkiyə indi AB üzvü deyil, amma bu birliyə daxil ola bilər. Türkiyənin demokratik sistemi, Konstitusiyası təkamül dövrünü yaşayır. Türkiyə AB-yə inteqrasiyasını davam etdirsə də, təkamül dövrünü keçməlidir" - deyən Brayza əlavə edib ki, daxili siyasi gərginliyi həll etmək Türkiyənin öz işidir.
"ABŞ-ın ultimatum verməsi və ya təhdid etməsi düzgün deyil" - deyə Brayza bildirib.
Onun fikrincə, AKP-nin bağlanması Türkiyənin AB-yə üzvlüyü prosesini ləngidərsə, bu ABŞ-ın da beynəlxalq maraqlarına zərər gətirər.
"Biz Türkiyədə siyasi və iqtisadi islahatarın aparılması səylərini dəstəkləyirik. AB-yə üzvlüyün mümkün olmaması Türkiyə liderlərinin lazımi islahatlar aparmasını daha da çətinləşdirəcək" - deyə ABŞ rəsmisi bildirib.
Məqalə müəllifi ilə əlaqə saxlamaq üçün elektron ünvan [email protected]
