Azərbaycan, Bakı, 28 iyun/ Trend , müxbir C.Babayeva/ Azərbaycanın müxalifətçi "Azadlıq" partiyasının Mərkəzi İcraiyyə Komitəsinin bu həftənin çərşənbə axşamı keçirilən iclasında partiyanın prezident seçkisində öz namizədi ilə iştirak etməsi barədə razılıq əldə olunub. Bu barədə şənbə günü Trend -a partiyanın sədri Əhməd Oruc məlumat verib.
Trend -un arayışı: Azərbaycanda prezident seçkisi oktyabrın 15-də keçiriləcək. İndiyə qədər Müsavat Partityasının başqanı İsa Qəmbərin, Azərbaycan Demokrat Partiyasının sədri Sərdar Cəlaloğlunun, Yaşıllar Partiyasının sədri Mais Güləliyevin, Bütöv Azərbaycan Xalq Cəbhəsi Partiyasının sədri Qüdrət Həsənquliyevin, Müasir Müsavat Partiyasının sədri Hafiz Hacıyevin namizədliyi təmsil olunduqları partiyalar tərəfindən irəli sürülüb. Bundan başqa, "Azərbaycan Naminə" İctimai Forumun rəhbəri Eldar Namazov müstəqil şəkildə namizədliyini irəli sürüb. Hakim Yeni Azərbaycan Partiyası hazırki dövlət başçısı İlham Əliyevin namizədliyini irəli sürmək niyyətindədir. İqtiadaryönlü Ana Vətən və Sosial Rifah partiyaları da seçkidə İlham Əliyevin namiəzdliyini müdafiə etmək qərarı veriblər. Üç müxalifət partiyasının (Azərbaycan Xalq Cəbhəsi, Vətəndaş və İnkişaf, Liberal) təmsil olunduğu "Azadlıq" bloku isə, seçkiləri boykot edəcəyi barədə bəyanat verib.
Orucun sözlərinə görə, razılıq əldə olunsa da, partiya yekun qərarını iyulun ikinci yarısında keçiriləcək Ali Məclisin iclasında qəbul edəcək. "Lakin istənilən halda, partiyanın son qərarı Demokratiya Uğrunda İttifaq (DUİ) ilə razılaşmadan sonra veriləcək", - deyə Oruc bildirib.
Onun sözlərinə görə, DUİ - də təmsil olunan Klassik Xalq Cəbhəsi Partiyasının sədri Mirhammud Mirəlioğlu prezidentliyə namizədliyini irəli sürərsə, "Azadlıq" partiyasının prezidentliyə namizədinin onun xeyrinə öz namizədliyini geri götürəcəyi mümkündür. "DUİ - də təmsil olunan partiyalar vahid mövqedən çıxış edir. İttifaq başqa namizədi dəstəkləmək barədə qərar verərsə, "Azadlıq" partiyası prezidentliyə namizədliyini irəli sürməkdən imtina edə bilər", - deyə o bildirib.
Oruc sədri olduğu partiyanın prezident seçkisində iştirak etmək istəyində olduğunu bildirsə də, indiki siyasi vəziyyətin davam edəcəyi halda, DUİ-dəki müttəfiqlərilə boykota gedəcəyi mümkün hesab edir. "Boykotu seçkiyə start verilənədək elan etməyin tərəfdarı deyilik. Bu, əvvəlcədən təslim olmaq deməkdir. Sona qədər Seçki Məcəlləsində hansısa şəkildə dəyişikliklərə nail olmaq lazımdır", - deyə partiya sədri əlavə edib.
Trend -un arayışı: "Azadlıq" partiyası 1995 - ci ildə təsis edilib və 2005-ci ildə dövlət qeydiyyatına alınıb. Partiya Klassik Xalq Cəbhəsi və Milli Demokrat partiyaları ilə Demokratiya Uğrunda İttifaqda təmsil olunur.
Məqalə müəllifi ilə əlaqə saxlamaq üçün ünvan - [email protected]