Azərbaycan, Bakı, 30 iyun/ Trend , müxbir C.Babayeva/ Azərbaycanın müxalif "Bizim Azərbaycan" blokunda prezident seçkisi ilə bağlı qərarın təsdiqlənməsi məsələsi fikir ayrılığı yaradıb. Blokun sədri Vüqar Bəyturanın bazar ertəsi Trend -a bildirdiyinə görə, Sədrlər Şurasının prezident seçkisində "Azərbaycan Naminə" İctimai Forumun rəhbəri Eldar Namazovu dəstəkləmək barədə qərarı yekun qərar hesab olunur. "Məclisin müzakirəsindən keçmiş qərarlar daha çox legitim hesab olunur. Amma blokun əsasnaməsinə görə, blokun ali orqanı Sədrlər Şurası qərar qəbul edibsə, bu qərar yekun qərardır", - deyə o bildirib.
Trend -un arayışı: "Bizim Azərbaycan" bloku 2003-cü ildə keçirilən prezident seçkisi dövründə prezidentliyə namizəd olan Müsavat Partiyasının başqanı İsa Qəmbərin namizədliyini dəstəkləmək üçün yaradılıb. Sonradan Müsavat Partiyası bloku tərk edib. Blokun Sədrlər Şurası prezident seçkisində "Azərbaycan Naminə" İctimai Forumun rəhbəri Eldar Namazovun namizədliyini dəstəkləmək barədə qərar qəbul edib. Azərbaycanda prezident seçkisi oktyabrın 15-də keçiriləcək. "Bizim Azərbaycan" blokunda təmsil olunmuş Fədailər Partiyası blokun dəstəkləyəcəyi namizəd partiyanın mövqeyini əks etdirmədiyinə görə, qurumu tərk edib. Sədrlər Şurasının qərarının qurumun Məclisi tərəfindən təsdiqlənəcəyi gözlənilirdi.
Bəyturanın sözlərinə görə, Məclisin iclası Sədrlər Şurasının qərarını partiyaya aid olmayan digər məclis üzvlərinə çatdırmaq üçün reallaşdırıla bilər. "İclasda blokun Sədrlər Şurasının qərarının dəyişdirilməsindən söhbət gedə bilməz", - deyə o əlavə edib.
"Bizim Azərbaycan" blokunun Məclis sədri Həsən Həsənovun bazar ertəsi Trend -a bildirdiyinə görə, Sədrlər Şurasının qərarı yaxın günlərdə keçiriləcək Məclisin iclasında mütləq müzakirə olunacaq. "Məclisin iclasını Sədrlər Şurası səviyyəsində Eldar Namazovla görüşəndən sonra keçirmək istəyirik. Namazov onu dəstəkləyənlərlə bir yerdə oturub müzakirə aparmaqdan imtina etsə, onun namizədliyinin dəstəklənməsinin əleyhinə olacağam", - deyə Həsənov bildirib.
Onun sözlərinə görə, blokun üzvləri arasında Namazovu dəstəkləməklə bağlı yekdil fikir yoxdur. "Məclisdə təmsil olunan QHT rəhbərləri və ziyalılar da onun namizədliyini dəstəkləməkdə maraqlı deyillər", - deyə o əlavə edib.
Onun qeyd etdiyi kimi, Eldar Namazovun hazırda bloka qarşı münasibəti onu qane etmir.
Məqalə müəllifi ilə əlaqə saxlamaq üçün ünvan - [email protected]