Azərbaycan, Bakı, 30 iyun / Trend , müxbir S.İlhamqızı/ Türkiyənin Konstitusiya Məhkəməsi hakim Ədalət və İnkişaf Partiyasının bağlanması barədə qərar çıxararsa, partiyanın əvvəlcədən hazırladığı ehtiyat planları işə salınacaq.
"AKP-nin bağlanması ehtimallarına qarşı artıq A, B, C planları hazırlanıb" - deyə AKP-dən olan millət vəkili Sadiq Yakut bildirib.
Türkiyə Böyük Millət Məclisində təmsil olunan müxalifət partiyaları - Cümhuriyyət Xalq Partiyası və Millətçi Hərəkat Partiyası AKP-ni dünyəvilik əleyhinə çıxmaqda günahlandıraraq, onun fəaliyyətinin dayandırılması tələbi ilə Konstitusiya Məhkəməsində iddia qaldırıblar. Sabah Konstitusiya Məhkəməsində iddia ilə əlaqədar məhkəmə prosesi başlanır.
AKP rəsmiləri A, B, C planlarının nədən ibarət olmasını açıqlamırlar, lakin bağlanma qərarı çıxarılarsa, AKP-nin bazasında yeni partiyanın yaradılacağı gözlənilir. Yakut bildirib ki, AKP komandası partiyanın bağlanacağına inanmır, lakin hər ehtimala qarşı, ehtiyat tədbirlər planı hazırlanıb: "AKP-nin bağlanmasına qərar verilərsə, bu planlar açıq müzakirəyə çıxarılacaq. Çox güman ki, AKP komandası yeni qurulacaq partiya ilə iqtidara, ölkəyə, millətə xidmətini davam etdirəcək" - deyə Yakut bildirib.
O, hətta əlavə edib ki, AKP-nin bazasında yaradılacaq yeni partiyanın adı da müəyyənləşdirilib.
"AKP-nin bağlanması qərarı çıxarılarsa, partiyada 29 millət vəkili ixtisara düşəcək və yerdə qalan 311 millət vəkili ilə birlikdə fəaliyyətimizi davam etdirəcəyik" - deyə AKP-dən olan digər millət vəkili Mehmet Ərdəm Trend -a bildirib.
O da AKP-nin bağanması ehtimalına qarşı partiyada bəzi planlar hazırlandığını etiraf edib və yeni partiyanın yaradılmasının mümkünlüyünü qeyd deyib.
"Biz AKP-nin bağlanacağına inanmırıq. Lakin siyasət adamları, üzərlərində məsuliyyət daşıyan insanlar, əlbəttə , yaxın gələcəyə dair fəaliyyət planı hazırlamaq məcburiyyətindədirlər. Ona görə də partiyanın mərkəzi qərargahı, səlahiyyətli orqanları tərəfindən tədbirlər planı hazırlanması normaldır" - deyə Ərdəm bazar ertəsi telefonla Ankaradan bildirib.
Onun sözlərinə görə, bağlanma qərarı çıxarılsa, AKP-çilər öz prinsiplərinə sadiq qalacaq və partiya rəhbərliyinin verəcəyi qərarlara uyğun hərəkət edəcəklər.
Ərdəmin fikrincə, həm məhkəmə, həm də hakim partiya bu prosesin Türkiyəyə zərər vurmadan başa çatmasına çalışmalıdır.
"Türkiyənin gələcəyi naminə Konstitusiya Məhəkməsinin ədalətli qərar verməsini gözləyirik. Çünki hazırda dünyada iqtisadi böhran yaşanır, neft bahalaşır, quraqlıq baş verir və bütün bu problemlər Türkiyəyə də öz təsirini göstərir. Ona görə də AKP-nin bağlanması qərarı Türkiyə üçün siyasi, iştisadi, sosial və digər sahələrdə mənfi nəticələr yaradacaq" - deyə millət vəkili bildirib.
Hakim partiyanı parlamentdə təmsil edən millət vəkili qrupunun başçısı Sadullah Ergin isə, AKP-də qabaqlayıcı planların hazırlanmasını təkzib edib.
"Biz AKP - nin bağlanacağını ehtimal etmirik və buna görə hər hansı planlar hazırlanmır" - deyə Ergin Trend -a bildirib.
Onun sözlərinə görə, hakim partiyanın komandası yekdilliklə AKP-nin bağlanmayacağı qənaətindədir. Erginin fikrincə, həm Türkiyə Konstitusiyasına, həm də beynəlxalq hüquq normalarına görə, partiyanın bağlanmasına dair iddianın qəbul edilmək şansı yoxdur.
Yakutdan fərqli olaraq, Ergin AKP-nin yerində yeni partiyanın yaradılması planlarını təkzib edib: "Yeni partiyanın yaradılmasına ehtiyac olmayacağını düşünürük" - deyə millət vəkili bildirib.
Hakim partiya AKP parlamentdə 340 nəfər millət vəkili ilə (paramentdə yerlərin 47 faizi) təmsil olunur.
Partiya dövlət və təhsil müəssisələrində baş örtüyünə qoyulan qadağanın götürülməsi ilə bağlı Konstitusiyaya dəyişiklik layihəsi hazırladı və parlamentdə qəbul olundu. Lakin Konstitusiya Məhkəməsi iyunun 5-də bu dəyişikliyi ləğv edərək, baş örtüyü qadağasını qüvvədə saxladı. Müxalifət partiyaları AKP-nin bu təşəbbüslərini dünyəviliyə təhlükə kimi qiymətdəndirirlər.
Məqalə müəllifi ilə əlaqə saxlamaq üçün elektron ünvan [email protected]
