Azərbaycan, Bakı, 01 iyul/ Trend , müxbir E.Babayev / Azərbaycanın müxalif Müsavat Partiyasının prezidentliyə namizədinin ətrafında seçki bloku yaradılmayacaq. "Yalnız ciddi zərurət yaranarsa, bu məsələ nəzərdən keçirilə bilər. Ancaq biz daha çox narazı elektoratı öz namizədimiz ətrafında toplamaq istiqamətində iş aparırıq", - deyə çərşənbə axşamı Trend -a Müsavat Partiyasının Mərkəzi İcra Aparatının rəhbəri Arif Hacılı məlumat verib.
Trend -un arayışı: Azərbaycanda prezident seçkisi oktyabrın 15-də keçiriləcək. Sağ-mərkəzçi Müsavat Partiyasının Məclisi 2007-ci ilin sonunda prezident seçkisində iştirak etmək haqda qərar qəbul edib. Məclis partiya başqanı İsa Qəmbərin namizədliyini irəli sürüb.
Azərbaycanın Seçki Məcəlləsi və "Sərbəst toplaşmaq azadlığı haqqında" qanununa əlavə və dəyişikliklər qəbul olunduqdan sonra Müsavat Partiyasının rəhbərliyində prezident seçkisində iştirak etməklə bağlı tərəddüd yaranıb. Hazırda partiyanın yerli strukturlarında Müsavatın seçkiyə gedib-getməməsi ilə bağlı müzakirələr aparılır.
Hacılı bildirib ki, indiyə qədər Müsavat tərəfindən blokun yaradılması üçün hər hansı partiya ilə danışıqlar aparılmayıb. Eyni zamanda, hər hansı bir partiya Müsavatın namizədini dəstəkləmək niyyətində olduğunu açıqlamayıb. "Təcrübə göstərir ki, narazı elektoratla iş aparmaq yolu ilə daha ciddi nəticələr əldə etmək mümkündür. Düzdür, 2003-cü il prezident seçkisində İsa Qəmbərin ətrafında "Bizim Azərbaycan" bloku yaradılmışdı. Ancaq bizim namizədin digər müxalifət namizədlərindən daha çox səs almasında narazı elektoratın İsa Qəmbərə səs verməsi xüsusi rol oynamışdı", - deyən Hacılının sözlərinə görə, Müsavat seçkidə təkbaşına iştirak etməklə ciddi nəticə əldə etmək imkanındadır. "Hesab edirik ki, seçkidə iştirak etsək, narazı elektorat daha çox bizim namizədə səs verəcək", - deyə o əlavə edib.
Müxalifəti təmsil edən Müsavat Partiyası 1992-ci ildə yaradılıb. Partiyanın başqanı Qəmbər Azərbaycan parlamentinin eks-spikeri (1992-93-cü illərdə) və 2003-cü ildə keçirilmiş prezident seçkisində prezidentliyə namizəd olub. Partiya beş nəfər deputatla parlamentdə təmsil olunur.
Məqalə müəllifi ilə əlaqə ünvanı: [email protected]
