Azərbaycan, Bakı, 03 iyul/ Trend , müxbir E.Babayev / Müxalif Vəhdət Partiyasının Siyasi Şurası bu il keçiriləcək prezident seçkisi ilə bağlı sonuncu müzakirələrini aparıb. "Bizim siyasi qərarımız tam aydındır və partiya üzvləri yekdilliklə İlham Əliyevi dəstəkləyir" - bunu cümə axşamı Trend -a partiyanın sədri Tahir Kərimli deyib.
Trend -un arayışı: Azərbaycanda prezident seçkisi oktyabrın 15-də keçiriləcək. İndiyə qədər Müsavat Partityasının başqanı İsa Qəmbərin, Azərbaycan Demokrat Partiyasının sədri Sərdar Cəlaloğlunun, Yaşıllar Partiyasının sədri Mais Güləliyevin, Bütöv Azərbaycan Xalq Cəbhəsi Partiyasının sədri Qüdrət Həsənquliyevin, Müasir Müsavat Partiyasının sədri Hafiz Hacıyevin namizədliyi təmsil olunduqları partiyalar tərəfindən irəli sürülüb. Bundan başqa, "Azərbaycan Naminə" İctimai Forumun rəhbəri Eldar Namazov müstəqil şəkildə namizədliyini irəli sürüb. Hakim Yeni Azərbaycan Partiyası hazırki dövlət başçısı İlham Əliyevin namizədliyini irəli sürmək niyyətindədir. İqtiadaryönlü Ana Vətən və Sosial Rifah partiyaları da seçkidə İlham Əliyevin namiəzdliyini müdafiə etmək qərarı veriblər. Üç müxalifət partiyasının (Azərbaycan Xalq Cəbhəsi, Vətəndaş və İnkişaf, Liberal) təmsil olunduğu "Azadlıq" bloku isə, seçkiləri boykot edəcəyi barədə bəyanat verib. Blokun Məclisində bu bəyanat müzakirəyə çıxarılıb, yekun qərar veriləcək.
Kərimli qeyd edib ki, Azərbaycanda seçki kampaniyasının müddətinin 125 gündən 75 günə endirilməsi Vəhdətin də seçki planlarında müəyyən dəyişikliklərə səbəb olub. Partiyanın iyula planlaşdırılan Baş Məclisinin iclasının vaxtı dəyişdirilərək, avqust ayına salınıb. "Baş Məclis seçki kampnaiyası dövründə keçiriləcək və İlham Əliyevi dəstəkləmək lə bağlı bəyanatımız rəsmiləşdiriləcək" - deyən Kərimlinin sözlərinə görə, Vəhdət dəstəklədiyi namizədin qalib gəlməsi üçün bütün imkanlarını səfərbər edəcək. "Biz inanırıq ki, İlham Əliyev 70 faizdən artıq səs qazanacaq. Ümid edirik ki, namizədimiz qalib gəldikdən sonra, bizim partiyanın üzvləri də hakimiyyət strukturlarında təmsil olunacaqlar" - deyə o əlavə edib.
Azərbaycanın Ali Məhkəməsinin keçmiş sədri, sabiq millət vəkili Tahir Kərimlinin rəhbərlik etdiyi Vəhdət Partiyası 2006-cı ilədək müxalifət mövqeyində olub. Partiya hazırda iqtidarın siyasi kursunu dəstəkləyir.
Məqalə müəllifi ilə əlaqə ünvanı: [email protected]
