Azərbaycanın prezidentliyə namizədlərinin gəlirləri barədə məlumatların siyahısı açıqlanıb
Azərbaycan, Bakı, 11 iyul / Trend , müxbir E.Babayev/ Azərbaycanın Mərkəzi Seçki Komissiyası (MSK) prezidentliyə namizədin gəlirlərinin miqdarı, mənbələri, mülkiyyəti və əmlakı barədə məlumatın təqdim edilməsi qayda larını təsdiq edib. Bu barədə cümə günü Trend -a MSK- dan məlumat verilib.
Trend -un arayışı:Azərbaycanda prezident seçkisinin oktyabrın ortalarında keçirilməsi nəzərdə tutulur. MSK bu ayın sonunda seçkinin dəqiq tarixini açıqlayacaq.
Təlimata əsasən, namizədin qeydə alınması üçün namizəd, namizədin, siyasi partiyanın, siyasi partiyalar blokunun səlahiyyətli nümayəndəsi MSK-ya müvafiq sənədlərlə birlikdə, namizədin gəlirlərinin miqdarı, mənbəyi və mülkiyyət hüququ əsasında ona məxsus əmlak haqqında məlumat təqdim etməlidir. Həmin məlumat seçkilərin təyin edildiyi gündən əvvəlki bir illik dövrü əhatə etməlidir. Eyni zamanda, bu məlumata gəlirlərin alındığı təşkilatlardan və fiziki şəxslərdən həmin gəlirlərin illik cəmi barədə arayışlar əlavə olunur.
Namizədlər ilk olaraq əsas iş yerindən əməkhaqqı barədə məlumat verməlidirlər. Əsas iş yerindən əməkhaqqı dedikdə, vətəndaşlar tərəfindən, mülkiyyət formasından asılı olmadan, müəssisələr, idarələr və təşkilatlarla bağlanmış əmək müqavilələrinə (kontraktlara) əsasən konkret ixtisas, dərəcə və vəzifə üzrə işlərin yerinə yetirilməsi, yaxud kooperativdə, kəndli-fermer təsərrüfatında, ictimai və ya dini təşkilatda, vəkillikdə, habelə xidməti və ya tədrislə əlaqədar əmək funksiyalarının yerinə yetirilməsinə görə ödənişlər başa düşülür.
Namizədlər mükafat və maddi yardım haqqında da məlumatları təqdim etməlidirlər. Bura il ərzində işin yekununa görə mükafat, xidmət illərinə görə mükafat, birdəfəlik xarakter daşıyan əlavə mükafatların bütün növləri, yubiley və bayram günləri, doğum günləri ilə bağlı və digər oxşar hallarda verilən həvəsləndirici ödənclər, əmək funksiyalarının yerinə yetirilməsinə görə digər mükafatlar və bütün növlərdən olan maddi yardımlar daxildir.
Namizədlər mülki-hüquqi müqavilələrdən əldə olunan gəlir haqqında məlumatların siyahısı, 2003-cü ildə qəbul olunan təlimatla müqayisədə, bir qədər genişləndirilib. İndiki təlimatda bura bağışlama, dəyişdirmə, vəzifənin icrası ilə əlaqədar olmayan işlərin yerinə yetirilməsindən əldə edilən gəlirlər (birdəfəlik və əvəzçilik üzrə) aid olunub. Əvvəlki təlimatda isə, yalnız vəzifə icrası ilə əlaqədar olmayan işləri yerinə yetirməkdən (birdəfəlik işlərin yerinə yetirilməsindən, əvəzçilik üzrə işlərdən) əldə edilən gəlirlər göstərilirdi.
Prezidentliyə namizədlər sahibkarlıq fəaliyyətindən əldə edilən gəlir haqqında da məlumat verəcəklər. Sahibkarlıq fəaliyyətindən əldə edilən gəlir dedikdə, Azərbaycan Respublikasının mövcud qanunvericiliyi ilə nəzərdə tutulan və qanunla qadağan edilməyən fəaliyyət növlərindən əldə edilmiş gəlirlər (sahibkarlıqla məşğul olan fiziki şəxs tərəfindən ilin yekununa görə vergi orqanlarına təqdim edilmiş bəyannamədə göstərilən gəlir) başa düşülür.
Namizədlərdən qeyri-sahibkarlıq fəaliyyətindən əldə edilən gəlirlər də tələb olunacaq. Bura muzdlu işlə əlaqədar və ya sahibkarlıq fəaliyyətindən əldə olunan gəlirlərdən başqa digər gəlirlər daxildir: banklardan və kredit idarələrindən alınmış faizlər; dividendlər; müəlliflik haqqı; royalti; qiymətli kağızlar üzrə əməliyyatlardan əldə edilən gəlir; bağışlanmış borcun məbləği; əmlakın icarəyə verilməsindən əldə edilən gəlir; həyatın yığım sığortası üzrə gəlir; ailə üzvü olmayan şəxslərdən alınan hədiyyələr və maddi yardım; alınmış miraslar; lotereya uduşları; birgə gəlirlər (ər-arvadın birgə nigah dövründə əldə etdikləri əmlak və digər gəlirlər, ümumi birgə mülkiyyətdə olan əmlak və s.); qanunla qadağan edilməyən digər gəlirlər.
Əvvəlki təlimatda isə, birgə gəlirlər bəndi yer almamışdı.
Əmlak və mülkiyyət haqqında məlumatlar əmlakın və mülkiyyət hüququnun qeydiyyatını həyata keçirən müvafiq orqanlardan alınmış arayışlarla təsdiq olunur.
Məqalə müəllifi ilə əlaqə ünvanı: [email protected]
