Azərbaycan, Bakı, 14 iyul / , müxbir S.İlhamqızı/ Azərbaycan prezidenti İlham Əliyev hesab edir ki, ölkə müstəqilliyini əldə etdikdən bəri qanunun aliliyinin bərqərar olunmasına və ölkənin qısa müddətdə inkişafını təmin edən hüquqi sistemin yaradılmasına xüsusi diqqət yetirilib.
"Azərbaycan qədim diyardır, lakin müstəqil ölkə kimi 17 yaşı var, bu illər ərzində siyasi sistemin dəyişdirilməsinə, qanunun aliliyinə xüsusi diqqət yetirilib" - deyə Prezident İlham Əliyev bazar ertəsi Konstitusiya Məhkəməsinin yaradılmasının 10 - cu ildönümü münasibətilə Bakıda keçirilən beynəlxalq konfransın iştirakçılarıını qəbul edərkən deyib.
Dövlət başçısı bu cür yüksək səviyyəli tədbirlərin keçirilməsinin təcrübə mübadiləsinin aparılması baxımından əhəmiyyətli olduğunu qeyd edib.
"Azərbaycan Avropa Şurasının üzvdür və 2001- ci ildən bir çox beynəlxalq sazişlərə və Konvensiyalara qoşulub" - deyən Prezident Əliyev qeyd edib ki, gələcəkdə görüləcək işlər hələ çoxdur. "Məhz bu səbəbdən də başladığımız və davam etdirməyi planlaşdırdığımız islahatları həyata keçirmək üçün fikir və təcrübə mübadiləsinin aparılması vacibdir".
Prezident Əliyev Avropa Şurası və digər beynəlxalq təşkilatlarla səmərəli əməkdaşlığın Azərbaycanın xarici siyasətinin prioritet istiqamətlərindən biri olduğunu deyib: "Azərbaycan Avropa ailəsinə inteqrasiya istiqamətində əhəmiyyətli addımlar atır. Avropa İttifaqı ilə həyata keçirilən yeni qonşuluq siyasəti uğurla icra olunur, enerji təhlükəsizliyi sahəsində görülən işlər buna misaldır"- deyə Prezident bildirib.
Dövlət başçısı Dağlıq Qarabağ münaqişəsindən danışıb, Ermənistanın Azərbaycanın 20 faiz ərazisini işğal etdiyini, nəticədə 1 milyon insanın doğma torpaqlarından didərgin düşdüyünü deyib.
Konstitusiya Məhkəməsinin sədri Fərhad Abdullayev konfarns iştirakçıları adından Prezident Əliyevə xatirə medalı təqdim edib.
Qazaxıstan Konstitusiya Şurasının sədri İqor Roqov, Macarıstan Konstitusiya Məhkəməsinin sədri Piter Pakjolay və Avropa Şurası Venesiya Komissiyasının katibi Canni Bukikkio və digər qonaqlar görüşdə iştirak ediblər.
Məqalə müəllifi ilə əlaqə saxlamaq üçün elektron ünvan [email protected]