Azərbaycan, Bakı, 16 iyul/ Trend , müxbir E.Babayev/ Azərbaycanın Mərkəzi Seçki Komissiyası (MSK) prezident seçkisində seçki fondlarına vəsaitin daxil olması, xərclənməsi uçotunun aparılması və hesabatı qaydaları haqqında təlimatı təsdiq edib.
"Prezidentliyə namizədlərin Seçki Fondu məbləginin yuxarı həddi 10 milyon manatdan çox ola bilməz", çərşənbə günü Trend -a MSK-dan məlumat verilib.
Trend -un arayışı: Azərbaycanda prezident seçkilərinə bu ayın sonunda rəsmən start veriləcək. Seçkinin oktyabrın ortalarında keçirilməsi nəzərdə tutulur.
MSK-nın təsdiq etdiyi təlimatda prezidentliyə namizədlərin seçki fondlarının hansı mənbələr hesabına formalaşması da yer alıb. Mənbələrə prezidentliyə namizədin özü tərəfindən 250.000 min manatdan çox olmamaq şərtilə xüsusi vəsait, MSK-nın ayırdığı vəsait (dövlət büdcəsindən ayrılan vəsait), vətəndaşların və hüquqi şəxslərin könüllü ianələri (vətəndaşların köçürdüyü vəsait 3000, hüquqi şəxslərin köçrüdüyü vəsait isə 50 000 manatdan çox ola bilməz) aiddir.
Namizədlərin seçki fondlarına könüllü ianə ayırmaq, yardım etmək isə bir sıra hallarda qadağan edilib. Xarici dövlətlərə və xarici hüquqi şəxslərə, xarici vətəndaşlara, vətəndaşlığı olmayan şəxslərə, 18 yaşına çatmamış şəxslərə, dövlət hakimiyyət orqanlarına və bələdiyyə qurumlarına, nizamnamə kapitalında dövlətin və ya bələdiyyənin iştirak payı 30 faizdən artıq olan hüquqi şəxslərə, hərbi hissələrə, dini qurumlara, xeyriyyə təşkilatlarına, beynəlxalq təşkilatlara və beynəlxalq ictimai təşkilatlara könüllü ianə ayırmaq təlimatda qadağan edilib.
Namizədlərin xüsusi seçki hesabları üzrə bütün əməliyyatlar səsvermə günündən sonra 3 gün müddətində dayandırılır.
Namizədlər seçki fondlarının vəsaitlərinə dair hesabat da verməlidirlər. Yekun maliyyə hesabatı seçkilərin nəticələrinin rəsmi dərc edildiyi gündən ən geci 10 gün sonra təqdim edilməlidir.
MSK, həmçinin xüsusi seçki hesablarının açılması qaydalarını da təsdiq edib. Hesab "Banklar haqqında" qanuna uyğun olaraq açılır. Namizədlər yalnız bir xüsusi seçki hesabı aça bilərlər. Müvafiq sənədlər təqdim edildikdən dərhal sonra müvafiq bank 3 gündən artıq olmayan müddətdə xüsusi seçki hesabı açmalıdır. Vəsaitlər hesaba manatla köçürülməlidir. Xüsusi seçki hesabına daxil olmuş anonim ianələr Seçki Məcəlləsinə uyğun olaraq dövlət büdcəsinə köçürüləcək.
Məqalə müəllifi ilə əlaqə ünvanı: [email protected]