Azərbaycan, Bakı, 23 iyul/ Trend , müxbir E.Babayev/ Azərbaycan Milli Məclisinin İqtisadi siyasət daimi komissiyası hesab edir ki, siyasi partiyalar dövlət büdcəsindən maliyyələşdirilərkən diferensiallaşmış yanaşmanın tətbiq olunması daha düzgündür. "Yəni 100 mindən artıq elektoratın səsini toplayan, parlamentdə yer tutan partiyalar daha yüksək səviyyədə maliyyələşdirilir, bu parametrlərə cavab verməyən partiyalara isə minimum maliyyə ayrılır", çərşənbə günü Trend -a Milli Məclisin İqtisadi siyasət daimi komissiyasının üzvü, millət vəkili Əli Məsimli bildirib.
Trend -un arayışı: Azərbaycanda 52 siyasi partiya dövlət qeydiyyatına alınıb. Milli Məclisdə hazırda 12 siyasi partiya təmsil olunur. Milli Məclis aparatının rəhbəri Səfa Mirzəyev Azərbaycanda siyasi partiyaların dövlət büdcəsindən maliyyələşdirilməsi məsələsinin nəzərdən keçirləcəyini bildirib. Onun sözlərinə görə, "Siyasi partiyalar haqqında" qanuna əlavə və dəyişikliklər edilərkən bu məsələyə kompleks şəkildə baxılacaq. Mirzəyev bildirib ki, dövlət büdcəsindən heç də bütün partiyalar maliyyələşə bilməz. Yəni Milli Məclisə keçirilən seçkilərdə müəyyən uğur qazanmış partiyalar, ölkə daxilində 4-5 faiz səs qazanan siyasi təşkilatlar dövlət büdcəsindən maliyyələşə bilər.
Məsimli deyib ki, beynəlxalq təcrübədə siyasi partiyaların dövlət büdcəsindən maliyyələşməsi praktikası var. Bu zaman müxtəlif meyarlar əsas götürülür. "Yəni siyasi proseslərdə fəal iştirak edən, parlament seçkilərində 4-5 faiz səviyyəsində səs yığan partiyalara üstünlük verilir. Amma digər partiyalar da maliyyələşir və bu zaman verilən maliyyənin həcmində fərq olur", - deyən Məsimli vurğulayıb ki, parlamentə düşməyən təşkilatlara maliyyə verilməsi yeni yaranan partiyaların güclənməsinə şərait yarada bilər. "Təzə partiyaların özlərini göstərməsi üçün vaxt lazımdır. Belə partiyaya maliyyə verilməsə, həmin təşkilat ruşeymindəcə məhv olacaq. Ona görə də dövlətçiliyin məlum parametrlərini əsas götürərək, fəaliyyət göstərən partiyalara da parlamentə düşməmələrinə baxmayaraq, maliyyə verilməlidir", - deyən Məsimli ilikin olaraq partiyalara nə qədər maliyyənin ayrılması barədə konkret fikir deməyə isə çətinlik çəkib. "Konkret rəqəm demək çətindir. Meyar kimi seçki zamanı bir dairədə seçki kampaniyası üçün xərclənən pul qəbul oluna bilər", - Məsimli vurğulayıb.
Məqalə müəllifi ilə əlaqə ünvanı: [email protected]
