Azərbaycan, Bakı, 30 iyul/ Trend , müxbir E.Babayev/ Hakim Yeni Azərbaycan Partiyası (YAP) hesab edir ki, bəzi müxalifət partiyalarının seçkiyə qoşulmaması seçici fəallığına təsir etməyəcək. "Hansısa partiyaların seçkilərə qatılıb-qatılmamasının nə ictimai rəyə, nə seçki prosesinə, nə seçici fəallığına, nə də seçkilərin nəticələrinə heç bir təsiri yoxdur və olmayacaq", çərşənbə günü Trend -a YAP icra katibinin müavini, millət vəkili Mübariz Qurbanlı bildirib.
Trend -un arayışı: Azərbaycanda prezident seçkisi oktyabrın 15-də keçiriləcək. Üç müxalifət partiyasının (Azərbaycan Xalq Cəbhəsi, Vətəndaş və İnkişaf, Liberal) təmsil olunduğu "Azadlıq" bloku isə seçkiləri boykot edəcəyi barədə qərar verib. Vətəndaş Həmrəyliyi, Kommunist, Böyük Quruluş partiyaları isə seçkidə öz namizədi ilə çıxış etməyəcək.
Hələ bu ilin əvvəllərindən seçkidə iştirakını bəyan edən Müsavat və Demokrat partiyaları isə avqustun 2-də seçkidə iştirak edib-etməməklə bağlı yekun qərarlarını açıqlayacaqlar. Hakim Yeni Azərbaycan Partiyası isə hazırki dövlət başçısı İlham Əliyevin namizədliyini irəli sürmək niyyətindədir
Qurbanlının sözlərinə görə, iddiası olan və hakimiyyət uğrunda mübarizə aparan bitərəf namizədlər, eləcə də siyasi partiyaların nümayəndələri seçkidə iştirak edəcək. "Azərbaycanda YAP-dan kənarda olan və rəsmən qeydiyyatdan keçən partiyaların nümayəndələri, eləcə də bitərəf şəkildə seçkilərə qatılan bütün namizədlər müxalifət sayılır. Müxalifətin hansının ağ, qara, qırmızı olduğunu müəyyənləşdirmirik, yəni müxalifətin təsnifatını vermirik. Bizə görə, hakimiyyət uğrunda YAP-la yarışa girən bütün partiyalar və namizədlər müxalifətdir", - deyən Qurbanlı bu baxımdan əsas müxalifət partiyalarının seçkiyə qoşulmadığı fikrinin doğru olmadığını vurğulayıb.
YAP 1992-ci ildə o vaxt Naxçıvan Ali Məclisinin sədri olan Heydər Əliyev tərəfindən yaradılıb. Azərbaycanda 15 ildir hakim partiya olan YAP-ın indiki sədri prezident İlham Əliyevdir
Məqalə müəllifi ilə əlaqə ünvanı: [email protected]