Türkiyə, Ankara, 08 avqust/ Trend , müxbir A.Ələsgərov/ İran prezidenti Mahmud Əhmədinejadın Türkiyəyə səfəri gələn həftə baş tutacaq. Səfər çərçivəsində onun Baş nazir Rəcəb Tayyib Ərdoğanla görüşü nəzərdə tutulub. Türkiyə icmalçılarının fikrincə, Ərdoğan görüşün gedişində Əhmədinejadı region ölkələri arasında münaqişələrin tənzimlənməsi üzrə Ankaranın son təşəbbüsləri haqqında məlumatlandıracaq və İrandan nüvə proqramı ətrafındakı böhran məsələsində bir az "yumşaq" mövqedən çıxış etməyi xahiş edəcək.
Məlum olduğu kimi, son vaxtlar Ankara Yaxın Şərqdə münaqişələrin tənzimlənməsi üzrə bir neçə diplomatik təşəbbüs irəli sürüb. Türkiyə bir tərəfdən İsrail və Fələstin, Livan və İsrail, İsrail və Suriya arasında vasitəçiliklə məşğuldur, digər tərəfdən isə İran və ABŞ arasında böhranı həll etməyə çalışır. Ankara İraqın ərazi bütövlüyünə tərəfdardır və regionun bütün ölkələri ilə iqtisadi və ticarət münasibətlərinin gücləndirilməsi üçün səylər göstərir.
Baş nazir Ərdoğan İsrail və Suriya arasında aktiv vasitəçilik rolu çərçivəsində, bazar ertəsi Bodrumda Türkiyəyə ailəsi ilə birlikdə istirahətə gəlmiş Suriya prezidenti Bəşər Əsədlə görüşüb. Türkiyə kütləvi informasiya vasitələrinin verdiyi məlumata görə, bu görüş beş saat davam edib. Rəhbərlər Türkiyə və Suriya arasındakı qarşılıqlı münasibətləti qiymətləndiriblər, ABŞ və İran arasında nüvə böhranının həll edilməsi məsələsi üzrə fikir mübadiləsi ediblər. Əsəd Baş nazir Ərdoğana İrandakı əlaqələri, problemin həll edilməsi üçün onun irəli sürdüyü təkliflər və İranın bu məsələdəki mövqeyi haqqında danışıb. Ərdoğan isə öz növbəsində, Əsədi İrana verilmiş məsləhət və tövsiyələr haqqında məlumatlandırıb və ABŞ və İran arasında danışıqların davam etdirilməsinin zəruriliyini qeyd edib. Rəhbərlərin görüşündə Suriyanın xarici işlər naziri Vəlid Mualim və Türkiyə Baş nazirinin müşaviri Əhməd Davudoğlu da iştirak edib.
İyunda ABŞ prezidentinin milli təhlükəsizlik məsələləri üzrə müşaviri Stiven Hedlinin Ankaraya səfərindən sonra Türkiyə İran problemi üzrə intensiv diplomatik fikir mübadiləsi məkanına çevrilib. ABŞ administrasiyasının nümayəndəsi Türkiyə rəhbərliyinə İranın nüvə layihələri ilə əlaqədar məsələlər üzrə narahatlığını bildirib. Rəsmi Ankaranın nümayəndəsi öz növbəsində, dəfələrlə bəyan edib ki, onlar mövcud qarşıdurmanın dialoq yolu ilə həll edilməsi üçün əllərindən gələni etməyə hazırdırlar.
İran prezidenti Əhmədinejadın gələn həftə Türkiyəyə baş tutacaq səfəri Ankaranın son diplomatik səylərinin Vaşinqton və Tehranın mövqelərinin yaxınlaşmasına nə dərəcədə kömək etdiyini göstərəcək.
